«Ёшлар — келажагимиз» давлат дастури доирасида амалга ошириладиган тадбиркорлик лойиҳаларини қўллаб-қувватлаш чора-тадбирлари тўғрисидаги ҳукумат қарори қабул қилинди. Бу ҳақда «Ҳуқуқий ахборот» канали маълум қилди.
Қарор билан қуйидаги низомлар тасдиқланди:
«Ёшлар — келажагимиз» давлат дастури доирасида давлат-хусусий шериклик шартларида «Ёш тадбиркорлар» коворкинг марказлари ва «Ёшлар меҳнат гузари» комплексларини қуриш ҳамда фаолиятини ташкил этиш тартиби тўғрисида;
«Ёшлар — келажагимиз» давлат дастури доирасида амалга ошириладиган тадбиркорлик лойиҳаларида Ўзбекистон ёшлар иттифоқи ҳузуридаги «Ёшлар — келажагимиз» жамғармасининг иштирок этиши тартиби тўғрисида.
Қарор билан тасдиқланган низомга кўра, давлат-хусусий шериклик шартлари асосида коворкинг марказлари ёки меҳнат гузарларини қуриш (жойлаштириш) истагини билдирган хусусий шерик туман (шаҳар) ҳокимлигига ариза билан мурожаат қилади.
Коворкинг марказлари ва меҳнат гузарларини қуриш учун аҳоли пунктлари таркибига кирадиган ер участкалари ажратилади.
Шунингдек, ушбу ҳужжат билан коворкинг марказлари ва меҳнат гузарларини қуриш учун давлат мулки бўлган бўш турган объектларни «нол» харид қиймати бўйича реализация қилиш тартиби белгиланди.
Коворкинг марказлари ва меҳнат гузарларини қуришда қурилиш қийматининг 30 фоизигача бўлган қисми «Ёшлар — келажагимиз» жамғармаси маблағлари ҳисобидан амалга оширилади.
Изоҳ (0)