Сурхондарё вилояти, Термиз шаҳридаги Абдураҳмон Жомий маҳалласида яшовчи Самандар Раҳимов (исм-шарифлар шартли) 2016 йилнинг дастлабки ойида мўмайгина даромад топишнинг турли йўлларини чўтлаб кўради. Бу ҳақда ЎзА хабар берди.
У соддадил йигитларни авраб, хорижга ишлаш учун жўнатишни қуюқ ваъда бериш орқали уларни чув туширишни режалаштиради.
Шу мақсадда «Байналмилал» маҳалласи яшовчи Насиба Зиёдованинг бирйўла икки ўғлига ўзини уддабурон, қўли узун одам сифатида кўрсатади. Гап орасида Канада давлатига ишлаш учун юбориш ўзи учун ҳеч гап эмаслигини айтиб қўяди. Лекин, бу ишлар хизмат ҳақисиз амалга ошмаслигини ҳам уқтиради. Шундай қилиб, Н.Зиёдованинг уйи олдида икки ўғлини Канадага ишлаш учун юбориш мақсадида нақд 19 минг 240 долларни санаб олади.
Қарийб икки йилдан буён ўғилларини хорижга жўнатишни кутавериб чарчаган онаизор яқинда Самандарга учрашгач, масала ойдинлашиб қолади. У олган маблағини аллақачон ўз эҳтиёжлари учун сарфлаб юборган экан. Шундан сўнг Н.Зиёдова ички ишлар идорасига мурожаат этиб, бўлиб ўтган воқеани маълум қилади.
Ушбу ҳолат бўйича 30 яшар С.Раҳимовга нисбатан Жиноят кодексининг 168-моддаси 3-қисми «а» банди билан жиноят иши қўзғатилди.
Изоҳ (0)