Ўзбекистонда қишлоқ хўжалиги корхоналари томонидан суғориладиган майдонларнинг ҳар гектаридан 40 центнердан кам ҳосил олиш «ерга нисбатан хиёнат» деб баҳоланиб, ер ижара шартномаси бекор қилинишигача чоралар кўрилади. Бу Вазирлар Маҳкамасининг «Бошоқли дон етиштиришни янада рағбатлантириш бўйича қўшимча чора-тадбирлар тўғрисида»ги қарорида кўзда тутилган.
Ҳужжатда 2019 йил ҳосили учун етиштириладиган 3-синфли юмшоқ буғдойнинг ҳар бир тоннаси учун кафолатланган давлат харидининг ўртача нархи 1 200 000 сўм миқдорида белгиланди.
2019 йил ҳосилидан бошлаб қишлоқ хўжалиги корхоналари томонидан суғориладиган майдонларда етиштирилган бошоқли дон ҳосилдорлигига қараб, давлат хариди учун етказиб берилган дон харид нархига 25 фоизгача устама ёки чегирма қўлланилади.
Бунда, бошоқли дон ҳосилдорлиги ҳар гектаридан:
41 центнердан 50 центнергача бўлганида 10 фоиз;
51 центнердан 60 центнергача бўлганида 20 фоиз;
61 центнер ва ундан юқори бўлганида 25 фоиз харид нархига устама;
Аксинча:
30 центнер ва ундан кам бўлганида 25 фоиз;
31 центнердан 40 центнергача бўлганида 15 фоиз харид нархига чегирма билан давлат хариди учун қабул қилинган доннинг умумий ҳажми ҳисоб-китоб қилинади.
Изоҳ (0)