Тошкент вилояти ички ишлар бошқармаси ЙҲХБ ва унинг жойлардаги бўлим, бўлинмалари томонидан йўл-транспорт ҳодисаларининг олдини олиш, қолаверса фуқаролар хавфсизлигини таъминлаш мақсадида жорий йилнинг 22 ноябрь куни Ўзбекистон Республикаси Вазирлар Маҳкамасининг 2015 йил 11 ноябрдаги «Сиқилган табиий газда, суюлтирилган нефть газида ёки дизель ва газсимон ёқилғи аралашмасида ишлайдиган транспорт воситаларининг хавфсизлиги тўғрисида умумий техник регламентни тасдиқлаш ҳақида»ги қарори ижросини таъминлаш юзасидан рейд ташкил этилди. Бу ҳақда ЎзА хабар бермоқда.
– Ўтказилган рейдлар давомида жами 68 та турли кўринишдаги қоидабузарликлар, хусусан, 18 ҳолатда газ баллонининг навбатдаги синовдан ўтказиш муддати ўтиб кетгани, 25 ҳолатда газда ишлаш учун қайта жиҳозланганлиги тўғрисидаги тегишли ҳужжатлар ҳайдовчиларнинг ёнида мавжуд бўлмагани, 12 ҳолатда ўзбошимчалик билан газ баллонини ўрнатиб олганликлари, 3 ҳолатда тегишли тартибда ЙҲХБдан рўйхатдан ўтмаганликлари аниқланиб, ҳайдовчиларга нисбатан тегишли ҳужжатлар расмийлаштирилди ҳамда транспорт воситалари вақтинчалик жарима майдончасига қўйилди, – дейди Тошкент вилояти ИИБ Йўл ҳаракати хавфсизлиги бошқармаси катта инспектори Рустам Асқаров. – Жумладан, тадбирлар давомида ҳайдовчи Х.Ш. бошқарувидаги «Лабо» русумли юк автомобили тўхтатиб текширилганда, автомобиль газда ишлаш учун қайта жиҳозланганлиги, лекин тегишли ҳужжатлари мавжуд эмаслиги, ҳайдовчи М.Ю. бошқарувидаги «ВАЗ-21011» русумли транспорт воситаси тўхтатиб текширилганда транспорт воситасига ўрнатилган газ баллони ҳозирда тақиқланган СПГ-2 туридаги (капрон) газ баллони эканлиги маълум бўлди.
Шунингдек, хабарда жорий йилнинг 1 ноябрь кунидаги рейдлар давомида ҳам бу каби қоидабузарликлар аниқланиб, ҳайдовчиларга нисбатан тегишли чоралар кўрилиши билан бир қаторда, газ ёқилғисини қуйиш учун келган вақтда газ қуйиш шохобчаларининг масъул ходимлари томонидан тегишли тартибда ҳужжатлари назорат кўригидан ўтказилиши, ҳужжатларида камчиликлари мавжуд бўлган ёки талабга жавоб бермайдиган газ баллонларига хавфсизлик нуқтаи назаридан газ ёқилғиси қуйишни чеклаш чораларини кўриш мақсадга мувофиқлиги ҳақида айтилади.
Тошкент вилоят ИИБ ЙҲХБ ва унинг жойлардаги бўлим, бўлинмалари томонидан бу борада олиб борилаётган рейдлар давом этмоқда.
Изоҳ (0)