Ўзбекистон тез тиббий ёрдам хизматини авиация техникаси билан таъминлаш чоралари кўрилмоқда

2018 йилнинг ўтган 11 ой давомида шошилинч тиббий ёрдам хизматига аҳолидан 8 миллиондан кўпроқ мурожаат тушган. Бу ҳақда Ўзбекистон Соғлиқни сақлаш вазирлиги ахборот хизмати маълум қилди.

Мурожаатларнинг 7 миллиондан кўпроғига тез тиббий ёрдам тизими орқали тиббий хизмат кўрсатилди. Бир миллиондан ошиқ бемор эса республика Шошилинч тиббий ёрдам илмий маркази ва унинг ҳудудий филиалларида стационар ва амбулатор шароитда даволанди.

«Кейинги йилларда давлат бюджетидан соҳа учун 1269 та ихтисослаштирилган автотранспорт харид қилинди ва ҳудудларнинг ушбу техникага бўлган эҳтиёжи тўлиқ қопланди, дори-дармон ва тиббий буюмлар билан таъминлаш уч баробарга кўпайди», — дейилади вазирлик ахборотида. Жумладан, бугунги кунда ҳар бир чақириқ учун минимал харажатлар 5000 сўм миқдорида белгиланган. Бу кўрсаткич 2016 йилда 748 сўмни, 2017 йилда 1627 сўмни ташкил этган эди.

Ўзбекистон Президентининг 2018 йил 25 январда қарорида тез тиббий ёрдам машиналарининг камида 10 фоизини махсус реанимация машиналари ташкил этиши лозимлиги белгиланган эди. Тошкент шаҳар тез тиббий ёрдам станцияси бош шифокори Даврон Султоновнинг таъкидлашича, бугунги кунга келиб тез тиббий ёрдам хизмати автопарки машиналарининг 10 фоизини замонавий тиббий асбоб-ускуналар билан жиҳозланган, хорижда ишлаб чиқарилган Hyundai, Nissan ва Toyota русумли реанимобиллар ташкил этмоқда.

Президентнинг 2018 йил 16 октябрдаги «Ўзбекистон Республикасида тез тиббий ёрдам хизматини такомиллаштириш чора-тадбирлари тўғрисида»ги қарорига асосан, тез тиббий ёрдамнинг автотранспорт паркини янада замонавийлаштириш, тез тиббий ёрдам машиналарини рациялар билан жиҳозлаш, Call-марказлар фаолиятини ривожлантириш, тиббиёт ходимлари етиб келгунга қадар ва шифохонагача бўлган босқичда тиббий ёрдамни такомиллаштириш, кадрлар малакасини ошириш, диагностика ва даволаш амалиётига янги технологияларни жорий этиш ишлари давом этаяпти.

«Шунинг билан бир қаторда, эндиликда тез тиббий ёрдам хизматини авиация техникаси билан таъминлаш чора-тадбирлари ҳам кўрилаётир», — дейилади Соғлиқни сақлаш вазирлиги ахборотида.