Самарқанд вилоятининг Ургут тумани Бешёғоч қишлоғида 30 октябрь куни тунги соат 22:30 атрофида қотиллик содир бўлгани ҳақида хабар берилган эди.
Қишлоқдаги 15-умумтаълим мактаби директори, 1986 йилда туғилган Анвар Юнусовга шу қишлоқда яшовчи, 1993 йилда туғилган М.М. ва 1998 йилда туғилган Ш.М. томонидан бошига оғир жароҳат етказилган, ҳодиса оқибатида Анвар Юнусов воқеа жойида ҳаётдан кўз юмган эди.
«Дарё» мухбири ушбу қотиллик юзасидан журналистик суриштирув ўтказган ва фожиага фуқароларнинг ўзаро ер талашиши сабаб бўлганини аниқлаганди.
Самарқанд вилояти Ургут тумани ҳокимлиги ушбу мақолада кўрсатилган масалаларга аниқлик киритиш мақсадида ўрганиш ўтказди. Ҳокимлик ўрганиш натижаларини «Дарё»га тақдим этди.
Ўрганиш давомида ушбу 2 гектарлик ер майдони ҳозирда туман ҳокимлиги захира ер майдони ҳисобида эканлиги аниқланди. Захира ер майдонига олингунга қадар ушбу ер майдонидан Бешёғоч маҳалласида яшовчи Хўжамурод Назаров фермер хўжалиги сифатида фойдаланиб келган.
Жорий йил март ойида қишлоқ хўжалик соҳасини ривожлантириш юзасидан тумандаги барча фермер хўжаликларида ҳукумат топшириқларининг бажарилиши ҳамда қишлоқ хўжалик маҳсулотларини етиштиришда агротехник тадбирларни бажариш ҳолати, шунингдек маҳсулот етиштириш режасининг бажарилиши ва таъминотчи корхоналар билан қарздорликлари ўрганилган.
Ўрганиш давомида Хўжамурод Назаров раҳбарлигидаги «Худойберди нурли даласи» фермер хўжалигининг ҳам қолоқ фермер эканлиги аниқланиб, фермер хўжаликни тугатиш масаласи Халқ депутатлари туман Кенгаши сессиясига киритилган ва Кенгашнинг 2018 йил 29 мартдаги 146-27-сонли қарорига кўра фермер хўжалик ер майдонини туман ҳокимлиги захирасига қайтариш таклифи маъқулланган. Шунга мувофиқ туман ҳокимининг 2018 йил 9 апрелдаги 651-Қ сонли қарори билан фермер хўжалик билан ер ижара шартномаси бекор қилинган ва ер майдони туман ҳокимлиги захирасига олинган.
Изоҳ (0)