Тожикистон расмий шахслари биринчи марта 8 ноябрь куни Хўжанд шаҳридаги 3-ахлоқ тузатиш ва меҳнат колониясида юз берган қўзғолон юзасидан изоҳ берди, деб ёзади Asia-Plus.
Мамлакат ташқи ишлар вазири Сирожиддин Муҳриддин Брюсселдаги матбуот анжуманида маълум қилишича, тартибсизликлар чоғида 21 нафар исёнчи зарарсизлантирилган, қўзғолонда асосан терроризм учун судланганлар, шу жумладан ИШИД тарафдорлари қатнашган.
«Колония қўриқчилари ва ходимлари исёнчиларни музокараларга чақирган, аммо улар қаршилик кўрсатишда давом этган, бир неча киши қочишга уринган… Ўлдирилган маҳбусларнинг 12 нафари Сурия ва Ироқда ИШИД томонида туриб жанг қилгани учун жазо ўтаётган эди, уч нафари — «Ансоруллоҳ», «Жундуллоҳ» ва Ўзбекистон ислом ҳаракати экстремистик гуруҳлари аъзолари бўлган, қолган олти киши қотиллик ва наркотик воситалар контрабандаси каби ўта оғир жиноятлар учун судланган», — деди Тожикистон ташқи ишлар вазири.
У ғалаён чоғида колониянинг икки ходими ўлдирилгани, беш қўриқчи оғир жароҳатлар билан касалхоналарда ётганини тасдиқлади. Хўжанд колониясидаги қўзғолонни такшириш билан Тожикистон Бош прокуратурасининг махсус гуруҳи шуғулланмоқда.
Аввалроқ қўзғолон қурбонлар сони 47 кишига етгани хабар берилган эди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)