Сергели туманида яшовчи Э.Х.нинг фарзанди Р.Р.Ҳамидуллиннинг вафоти юзасидан Тошкент шаҳар соғлиқни сақлаш бош бошқармасининг мутахассислари томонидан текширув олиб борилди. Соғлиқни сақлаш вазирлиги ахборот хизматидан маълум қилишларича, текширувда Э.Х.нинг фарзандига эмлашнинг тўғри қилинганлиги, унинг стандартларга мослиги, миқдори ва муддати каби жиҳатлари ҳам чуқур ўрганиб чиқилган.
Маълум бўлишича, бола 24 август куни Сергели тумани 10-оилавий поликлиникада болалар шифокори Н.Расулова томонидан тиббий кўрикдан ўтказилган ва режа асосида икки ойликдаги эмлашга рухсат берилган. Ўша куни боланинг онаси Э.Х. фарзандига полиомиелит ва пневмококкга қарши вакциналарни олган. Эмлаш махсус рухсатномаси бўлган ҳамшира М.Саликова томонидан амалга оширилган.
Орадан икки кун ўтиб — 26 август куни соат тахминан 11:00 да боланинг тана ҳарорати 38,5 даражага кўтарилгани кузатилганлиги учун тез ёрдам чақирилган ҳамда беморга биринчи тиббий ёрдам кўрсатилиб, 3-шаҳар болалар клиник шифохонасига олиб борилган. Невропатолог шифокор Ш.Насруллаев тиббий кўрикдан ўтказиб, «Талваса синдроми. Соматоген асосланган. Бош мия шиш хавфи» ташхиси қўйилиб, муолажа қилинган.
Аммо 28 август куни соат 19:30 да боланинг аҳволи оғирлашавергач, Республика шошилинч тиббий ёрдам илмий маркази (РШТЁИМ)нинг болалар реанимацияси бўлимига ўтказилган. Болага керакли даво чоралари кўрсатилишига қарамай, бемор 30 август куни соат 24:00 да марказда вафот этган.
«Мутахассисларнинг хулосасига кўра, боланинг ўлимига эмлаш сабаб бўлмаган», — дейилади Соғлиқни сақлаш вазирлиги ахборот хизмати хабарида.
«24 август куни Сергели туманидаги 10-оилавий поликлиникада жами 128 нафар бола эмланган. Ўтказилган таҳлиллар нафақат ушбу болада, балки эмланганларнинг бирортасида ҳам эмлашдан сўнг юз бериши мумкин бўлган нохуш ҳолатлар кузатилмаганлигини кўрсатди», — дейди Соғлиқни сақлаш вазирлиги Санитар эпидимиология назорати бош бошқармаси бошлиғи Дилмурод Мирзабоев.
Вазирикдан қўшимча қилишларича, юқоридаги вазият — боланинг вафоти юзасидан тиббиёт ходимларининг хатти-ҳаракатлари, болага ташхис қўйиш ва даволаш жараёни Соғлиқни сақлаш вазирлиги мутахассислари ҳамда ҳуқуқ-тартибот органлари томонидан чуқур ўрганилмоқда.
Бош прокуратура маълумотига кўра, чақалоқ Р.Р.Ҳамидуллиннинг ўлимига, дастлабки маълумотларга кўра, 3-сонли шаҳар болалар клиник шифохонаси шифокорлари ўз касбига нисбатан бепарволик ёки инсофсизлик билан муносабатда бўлиши, касб юзасидан ўз вазифаларини бажармаганлиги ёки лозим даражада бажармаганлиги сабабчи бўлган.
Мазкур ҳолат юзасидан 17 ноябрь куни Тошкент шаҳар прокуратураси томонидан Жиноят кодексининг 116-моддаси 3-қисми («одам ўлишига сабаб бўлган касб юзасидан ўз вазифаларини лозим даражада бажармаслик») билан жиноят иши қўзғатилиб (ушбу модда бўйича энг оғир жазо — беш йилгача озодликдан маҳрум қилиш), дастлабки тергов ҳаракатларини олиб бориш учун Учтепа туман прокуратурасига юборилган.
Мазкур жиноят иши тергови Бош прокуратура назоратига олинган.
Изоҳ (0)