Самарқандда аввал рақсга тушиб, сўнг автомобиль капотида ўтирган қизларнинг ҳаракатлари юзасидан Самарқанд вилоят Ички ишлар бошқармаси расмий маълумот тақдим этди. Бу ҳақда «Дарё» мухбири Фарҳод Норбўтаев хабар бермоқда.
Самарқанд вилоят ИИБ матбуот хизмати раҳбари Ширин Норматова берган маълумотга кўра, 20 ноябрь куни Telegram ва бошқа ижтимоий тармоқларда тарқалган видеода ёши тахминан 20-25 ёшлар атрофида бўлган 2 нафар қиз кўчада жамиятда юриш туриш қоидаларини қасддан менсимасдан, беҳаёларча йўл четида ўйнаб, номаълум автомашинанинг олд капотига ётиб олиб, ҳаракатланиб кетаётганлиги ҳолати тасвирланган.
Мазкур ҳолат юзасидан Каттақўрғон шаҳар ИИБ ходимлари томонидан олиб борилган тезкор текширув ишлари натижасида 13 ноябрь куни соат 16:00 ларда Каттақўрғон шаҳри Амир Темур кўчасида юриш туриш қоидаларини қасддан беҳаёларча менсимасдан ўйнаётган, сочлари калта сарғиш рангли қиз Каттақўрғон тумани Пайшанба шаҳарчасида яшовчи Д.Ч. У билан рақсга тушган қиз Каттақўрғон шаҳрида яшовчи У.Ф. эканлиги, автомашина бошқарувида Каттақўрғон шаҳрида яшовчи Р.С. отаси Р.Н.га тегишли Nexia-1 русумли автомашинани ҳеч бир ҳужжатларсиз бошқарганлиги аниқланган. Мазкур ҳолатларни улар билан бирга бўлган Каттақўрғон шаҳрида яшовчи М.Н. қўл телефонида тасвирга олган ва ижтимоий тармоқларга тарқатиб юборган.
Терговга қадар текширув ҳаракатлари натижасига кўра, Р.С. отаси Р.Н.га тегишли Nexia русумли автомашинани ҳужжатларсиз бошқарганлиги сабабли, унга нисбатан Ўзбекистон Республикаси МЖтКнинг 135-моддаси 2-қисми (Транспорт воситаларини бошқариш ҳуқуқи бўлмаган шахсларнинг шу воситаларни бошқариши, худди шунингдек бошқариш ҳуқуқи бўлмаган шахсга транспорт воситаларини бошқаришнинг топширилиши) ва 138-моддаси 4-қисми (Транспорт воситаси ҳаракатланаётган вақтда йўловчи томонидан тана қисмларини (қўлдан ташқари) салондан чиқариш) билан ҳамда Р.Н.га нисбатан Ўзбекистон Республикаси МЖтКнинг 135-моддаси 2-қисми билан маъмурий баённома тузилди.
Д.Ч., У.Ф., Р.С. ва М.Н.ларга нисбатан МЖтКнинг 183-моддаси (Майда безорилик) билан маъмурий баённома тузилган. Майда безорилик, яъни жамоат жойларида уятли сўзлар билан сўкиниш, фуқароларга ҳақоратомуз шилқимлик қилиш ҳамда жамоат тартибини ва фуқароларнинг осойишталигини бузувчи шу каби бошқа хатти-ҳаракатларда ифодаланган жамиятда юриш-туриш қоидаларини қасддан менсимаслик энг кам иш ҳақининг уч бараваридан беш бараваригача миқдорда жарима солишга ёки ўн беш суткагача муддатга маъмурий қамоққа олишга сабаб бўлади. Иш бўйича тўпланган ҳужжатлар Маъмурий ишлар бўйича Каттақўрғон шаҳар судига юборилган.
Мазкур ҳолат юзасидан Каттақўрғон шаҳрида ИИБ ва мутасадди ташкилот вакиллари иштирокида йиғилиш бўлиб ўтди.
Изоҳ (0)