Депутат Мақсуд Қурбонбоев: Тиббиёт соҳасидаги ислоҳотларни биринчи галда аҳоли сезиши керак

Ўзбекистонда ҳеч бир соҳага кейинги икки йил мобайнида тиббиёт тизимигачалик катта эътибор қаратилгани йўқ. Лекин шунга қарамай, соҳада кўзланган натижаларга эришиш суст кечяпти. Олий Мажлис Қонунчилик палатаси депутати Мақсуд Қурбонбоев шундай фикр билдирган.

Бу Президент Шавкат Мирзиёев раислигида 9 ноябрь куни соғлиқни сақлаш тизимини ривожлантириш, аҳолини сифатли тиббий хизмат билан қамраб олиш, тиббиёт муассасалари моддий-техник базасини мустаҳкамлаш борасидаги ислоҳотлар натижаларини таҳлил қилиш ва истиқболдаги устувор вазифаларни белгилашга бағишланган видеоселектор йиғилишида ҳам кўп бор таъкидланди. Соҳадаги камчиликлар бирма-бир санаб ўтилди.

Давлат раҳбари қайд этганидек, шунча фармон ва қарорлар чиқарилиб, соҳага имкониятлар яратилди. Долзарб масалалар ҳал қилиб берилди. Бироқ соғлиқни сақлаш тизимида кутилган натижалар амалда кўринмаяпти. Айниқса, туманлар, чекка қишлоқлардаги аҳоли тиббий хизматдаги жиддий ва туб ўзгаришларни ўз ҳаётида сезаётгани йўқ.

Агар сезганида эди, биргина жорий йилнинг ўтган даврида Президентнинг виртуал қабулхонасига тиббиёт соҳасига доир 45 мингдан зиёд мурожаат келиб тушмаган бўларди. Демак, бу соҳада ҳали муаммолар оз эмас.

Давлат раҳбари томонидан Олий Мажлис Қонунчилик палатаси мамлакатда соғлиқни сақлаш тизимини ривожлантириш масаласига масъул этиб белгиланган. Аммо ўтган вақт мобайнида қуйи палата томонидан соғлиқни сақлаш соҳасида амалга оширилган ишларни, афсуски, қониқарли деб бўлмайди. Шу маънода, мазкур соҳадаги ҳар бир масала, кўламидан қатъи назар, парламентни ўйлантириши лозим.

Парламент аъзолари ўтган вақт мобайнида бу борада эришилган натижалардан кўра, йўл қўйилган камчиликларни ҳар тарафлама таҳлил қилиб, истиқболни белгилаши, халқнинг малакали тиббий хизматдан тўлақонли фойдалана олишига шароит яратишга қаттиқ киришиши лозим. Бунда хусусий тиббиёт муассасалари тармоғини янада кенгайтириш, хусусий тиббиётнинг барча тармоқларини ривожлантириш ҳам яхши натижа бериши шубҳасиз.

Шунингдек, энг муҳими, соҳага доир муаммоларни комплекс ечишга қаратилган қонун ҳужжатларини ишлаб чиқиб, қабул қилиш мақсадга мувофиқ бўлади.