O‘zbekistonda hech bir sohaga keyingi ikki yil mobaynida tibbiyot tizimigachalik katta e’tibor qaratilgani yo‘q. Lekin shunga qaramay, sohada ko‘zlangan natijalarga erishish sust kechyapti. Oliy Majlis Qonunchilik palatasi deputati Maqsud Qurbonboyev shunday fikr bildirgan.
Bu Prezident Shavkat Mirziyoyev raisligida 9-noyabr kuni sog‘liqni saqlash tizimini rivojlantirish, aholini sifatli tibbiy xizmat bilan qamrab olish, tibbiyot muassasalari moddiy-texnik bazasini mustahkamlash borasidagi islohotlar natijalarini tahlil qilish va istiqboldagi ustuvor vazifalarni belgilashga bag‘ishlangan videoselektor yig‘ilishida ham ko‘p bor ta’kidlandi. Sohadagi kamchiliklar birma-bir sanab o‘tildi.
Davlat rahbari qayd etganidek, shuncha farmon va qarorlar chiqarilib, sohaga imkoniyatlar yaratildi. Dolzarb masalalar hal qilib berildi. Biroq sog‘liqni saqlash tizimida kutilgan natijalar amalda ko‘rinmayapti. Ayniqsa, tumanlar, chekka qishloqlardagi aholi tibbiy xizmatdagi jiddiy va tub o‘zgarishlarni o‘z hayotida sezayotgani yo‘q.
Agar sezganida edi, birgina joriy yilning o‘tgan davrida Prezidentning virtual qabulxonasiga tibbiyot sohasiga doir 45 mingdan ziyod murojaat kelib tushmagan bo‘lardi. Demak, bu sohada hali muammolar oz emas.
Davlat rahbari tomonidan Oliy Majlis Qonunchilik palatasi mamlakatda sog‘liqni saqlash tizimini rivojlantirish masalasiga mas’ul etib belgilangan. Ammo o‘tgan vaqt mobaynida quyi palata tomonidan sog‘liqni saqlash sohasida amalga oshirilgan ishlarni, afsuski, qoniqarli deb bo‘lmaydi. Shu ma’noda, mazkur sohadagi har bir masala, ko‘lamidan qat’i nazar, parlamentni o‘ylantirishi lozim.
Parlament a’zolari o‘tgan vaqt mobaynida bu borada erishilgan natijalardan ko‘ra, yo‘l qo‘yilgan kamchiliklarni har taraflama tahlil qilib, istiqbolni belgilashi, xalqning malakali tibbiy xizmatdan to‘laqonli foydalana olishiga sharoit yaratishga qattiq kirishishi lozim. Bunda xususiy tibbiyot muassasalari tarmog‘ini yanada kengaytirish, xususiy tibbiyotning barcha tarmoqlarini rivojlantirish ham yaxshi natija berishi shubhasiz.
Shuningdek, eng muhimi, sohaga doir muammolarni kompleks yechishga qaratilgan qonun hujjatlarini ishlab chiqib, qabul qilish maqsadga muvofiq bo‘ladi.
Izoh (0)