Тошкентнинг Мирзо Улуғбек туманида хусусий қурилиш компанияси томонидан қурилган ва хавфсизлик ҳамда қурилиш стандартларига жавоб бермайдиган янги уйлар бузиб ташланди. Бу ҳақда Sputnik хабар бермоқда.
«Ўзбекистон 24» телеканали лавҳасида айтилишича, октябрь ойи охирида айнан ушбу корхона Чилонзорда қурган уйда Акбаровлар оиласининг 4 нафар аъзоси ис газидан заҳарланиб ўлганди. Экспертлар кейинчалик газ сизишига газ қувурларини ўтказишда меъёрларга риоя этилмагани сабаб бўлганини аниқлади.
Мазкур фожиадан сўнг компаниянинг бошқа объектлари текширилганда яна кўплаб қўпол хатолар аниқланди. Баъзи уйлар орасида атиги 3 метр масофа қолдирилгани, янги уйлар иссиқлик қувурлари устида қурилгани, биринчи қаватдан чиқаётган газ тутуни иккинчи қават ойнасига кираётгани шулар жумласидан.
Шунингдек, уйларнинг айримлари дастлаб боғча деб расмийлаштирилиб, кейинчалик хусусий уйга айланиб қолганлиги айтилмоқда.
Изоҳ (0)