GM Uzbekistan «Қашқадарё Автотеххизмат» МЧЖ билан дилерлик келишувини бекор қилди

GM Uzbekistan «Қашқадарё Автотеххизмат» МЧЖ билан дилерлик келишувини бекор қилди. Бу ҳақда компания матбуот хизмати хабар бермоқда.

Автосалон фаолияти, шунингдек, автомобиллар сақланаётган омборхоналарда аниқланган қоидабузарликлар келишув бекор қилинишига олиб келгани билдирилмоқда.

Жумладан:

2018 йил январь ойидан ҳозирги даврга қадар GM Uzbekistan компаниясига жисмоний ва юридик шахслардан «Қашқадарё Автотеххизмат» МЧЖ дилерлик корхонаси фаолиятига доир 420 та мурожаат келиб тушган. Шундан 117 та мурожаат дилерлик корхонасининг мижозларга нисбатан қўпол ва ҳақоратомуз ҳаракатлари ёки ҳаракатсизлиги билан боғлиқ. Шунингдек, 10 та мурожаатда мижозлар томонидан «Қашқадарё Автотеххизмат» МЧЖ ходимларининг коррупцион ҳаракатларига оид далиллар келтирилган;

Автомобильлар сотишни ҳисобга олишга доир ҳужжатлар ўрганилганда дилерлик корхонаси ва мижоз ўртасида имзоланмаган шартномалар мавжудлиги аниқланди. Шунингдек, шартномалар ва бошқа ҳужжатлар ўрганилганда мижозларнинг имзолари ҳаққоний эмас деб гумон қилинди. Ушбу ҳужжатлар ҳаққонийлигини аниқлаш мақсадида экспертиза учун тегишли идораларга тақдим этилади;

Автомобильи ҳали берилмаган 487 та шартнома ўрганилганда 47 та шартномада мижозлар имзоси йўқлиги маълум бўлди;

Дилерда мавжуд автомобиллар ҳисоб-китоб қилинганда омборда ортиқча сақланаётган автомобиллар мавжудлиги аниқланди;

Автомобильини кутаётган айрим харидорларга қўнғироқ қилинганда улар автомобиллари салонга етказилганлиги ҳақида огоҳлантирилмаган. 2018 йилнинг 10 сентябридан 6 ноябрига қадар GM Uzbekistan акцияси доирасида Spark автомобилини харид қилган баъзи харидорларга велосипедлар олиш учун ваучер берилмаган. Автосалонда call-марказ ва қўнғироқ қабул қилиш учун масъул ходим бўлмаган.

Компания камчиликларга йўл қўяётган дилерлик марказлари фаолиятини ўрганишда давом этади.