GM Uzbekistan “Qashqadaryo Avtotexxizmat” MChJ bilan dilerlik kelishuvini bekor qildi. Bu haqda kompaniya matbuot xizmati xabar bermoqda.
Avtosalon faoliyati, shuningdek, avtomobillar saqlanayotgan omborxonalarda aniqlangan qoidabuzarliklar kelishuv bekor qilinishiga olib kelgani bildirilmoqda.
Jumladan:
2018-yil yanvar oyidan hozirgi davrga qadar GM Uzbekistan kompaniyasiga jismoniy va yuridik shaxslardan “Qashqadaryo Avtotexxizmat” MChJ dilerlik korxonasi faoliyatiga doir 420 ta murojaat kelib tushgan. Shundan 117 ta murojaat dilerlik korxonasining mijozlarga nisbatan qo‘pol va haqoratomuz harakatlari yoki harakatsizligi bilan bog‘liq. Shuningdek, 10 ta murojaatda mijozlar tomonidan “Qashqadaryo Avtotexxizmat” MChJ xodimlarining korrupsion harakatlariga oid dalillar keltirilgan;
Avtomobillar sotishni hisobga olishga doir hujjatlar o‘rganilganda dilerlik korxonasi va mijoz o‘rtasida imzolanmagan shartnomalar mavjudligi aniqlandi. Shuningdek, shartnomalar va boshqa hujjatlar o‘rganilganda mijozlarning imzolari haqqoniy emas deb gumon qilindi. Ushbu hujjatlar haqqoniyligini aniqlash maqsadida ekspertiza uchun tegishli idoralarga taqdim etiladi;
Avtomobili hali berilmagan 487 ta shartnoma o‘rganilganda 47 ta shartnomada mijozlar imzosi yo‘qligi ma’lum bo‘ldi;
Dilerda mavjud avtomobillar hisob-kitob qilinganda omborda ortiqcha saqlanayotgan avtomobillar mavjudligi aniqlandi;
Avtomobilini kutayotgan ayrim xaridorlarga qo‘ng‘iroq qilinganda ular avtomobillari salonga yetkazilganligi haqida ogohlantirilmagan. 2018-yilning 10-sentabridan 6-noyabriga qadar GM Uzbekistan aksiyasi doirasida Spark avtomobilini xarid qilgan ba’zi xaridorlarga velosipedlar olish uchun vaucher berilmagan. Avtosalonda call-markaz va qo‘ng‘iroq qabul qilish uchun mas’ul xodim bo‘lmagan.
Kompaniya kamchiliklarga yo‘l qo‘yayotgan dilerlik markazlari faoliyatini o‘rganishda davom etadi.
Izoh (0)