Фарғона вилоятида жорий йилнинг 5—6 ноябрь кунлари белгиланган тартибда давлат рўйхатидан ўтмасдан тадбиркорлик фаолиятини амалга ошираётган фуқароларни аниқлаш юзасидан назорат тадбирлари ўтказилиб, 14 хил турдаги 240 дона қарийб 3 миллион сўмлик қўл бола иситиш анжомлари далилий ашё сифатида вақтинча сақлаш учун олинди. Бу ҳақда ЎзА хабарида айтилади.
Айтиш мумкин, бу билан 240 хонадоннинг қўлбола ностандарт иситиш мосламаларидан фойдаланиши оқибатида келиб чиқиши мумкин бўлган кўнгилсизликлар бартараф этилди, дейилади хабарда.
Жумладан, Марғилон шаҳрида истиқомат қилувчи фуқаро Э.I. ҳеч қандай ҳужжатларсиз қўлбола ясалган ностандарт иситиш мосламаларини ишлаб чиқариб, шаҳар ҳудудидаги бозорда сотиш билан шуғулланиб келаётганлиги аниқланиб, белгиланган тартибда далолатнома расмийлаштирилди. Натижада, ушбу «тадбиркор»нинг 6 хил турдаги 200 дона 916,5 минг сўмлик, худди шундай фаолият билан шуғулланиб келаётган фарғоналик «уддабурон»нинг эса 3 хил турдаги 5 дона 850 минг сўмлик товар моддий бойликлари далилий ашё сифатида вақтинча сақлаш учун олиб қўйилди.
Шунингдек, Қўқон шаҳридаги З.Волидий кўчасида жойлашган устахонада фуқаро С.М. 15 кундан буён ҳеч қандай ҳужжатларсиз қўлбола иситиш печларини ясаш билан шуғулланаётганлиги аниқланди. Натижада, қоидабузарга белгиланган тартибда чора кўрилди ҳамда унинг 1 миллион сўмдан ортиқ қийматдаги 5 турдаги қўлбола ясалган тунука иситиш анжомлари ҳам олинди.
Изоҳ (0)