Покистон Олий суди Муҳаммад пайғамбар (с.а.в.)ни ҳақорат қилишда айбланган насроний аёл — Осиё Биби (Осиё Норин)ни оқлади ва унга нисбатан 2010 йили чиқарилган ўлим ҳукмини бекор қилди. Бу ҳақда «Ведомости» хабар бермоқда.
Судьяларнинг хулосасига кўра, айблов томони судланувчининг айбини исботлай олмаган, иқрорлик кўрсатмалари эса аёлни ғазабнок оломон қўлига топшириш таҳдиди остида олинган. Иш кўриб чиқилаётган вақтда Олий суд биносини кўплаб полициячилар қўриқлаб турган. Олий суднинг қарори жамиятнинг динни таҳқирлашга доир қонунлар қатъий бўлиши тарафдори бўлган қисми норозилигига сабаб бўлиб улгурган.
Биби 2010 йили, Муҳаммад пайғамбар (с.а.в.)ни ҳақорат қилгани учун динни таҳқирлашда айбдор деб топилиб, осиб ўлдиришга ҳукм қилинган эди.
Маълум бўлишича, Биби 2009 йил июнида Шекҳпур округидаги Иттан Вали қишлоғида мева тераётганида маҳаллий аҳоли «мусулмонларники» деб ҳисоблайдиган қудуқдан сув ичган. Биби билан бирга ишлаётган аёллар уни сувни булғашда айблаган ва шундан сўнг қишлоқда жанжал келиб чиққан.
Шундан сўнг Бибини қўллаб-қувватлаган ва умуман динни таҳқирлашга доир қонунларни ислоҳ қилиш юзасидан фикр билдирган Панжоб вилояти губернатори Салмон Таъсир ўз қўриқчиси томонидан отиб ташланган. Қотил қатл этилган, бироқ унинг тарафдорлари сиёсий партия тузиб, яқинда бўлиб ўтган сайловларда икки миллионга яқин овоз олди. Бибини қўллаб-қувватлаган озчилик ишлари бўйича вазир Шаҳбоз Бҳатти ҳам ўлдириб кетилган.
Бир неча мамлакатлар Бибига бошпана таклиф қилган. Олий суднинг сўнгги мажлисида аёлнинг ўзи қатнашмаган ва оқлангани ҳақидаги хабарга ҳам ишонқирамаган. «Эшитганларимга ишонгим келмаяпти. Мен ҳозир чиқиб кетсам бўлаверадими? Наҳотки мени қўйиб юборишаётган бўлса?», — дея Бибининг сўзларидан иқтибос келтирмоқда AFP.
Изоҳ (0)