Pokiston Oliy sudi Muhammad payg‘ambar (s.a.v.)ni haqorat qilishda ayblangan nasroniy ayol — Osiyo Bibi (Osiyo Norin)ni oqladi va unga nisbatan 2010 yili chiqarilgan o‘lim hukmini bekor qildi. Bu haqda “Vedomosti” xabar bermoqda.
Sudyalarning xulosasiga ko‘ra, ayblov tomoni sudlanuvchining aybini isbotlay olmagan, iqrorlik ko‘rsatmalari esa ayolni g‘azabnok olomon qo‘liga topshirish tahdidi ostida olingan. Ish ko‘rib chiqilayotgan vaqtda Oliy sud binosini ko‘plab politsiyachilar qo‘riqlab turgan. Oliy sudning qarori jamiyatning dinni tahqirlashga doir qonunlar qat’iy bo‘lishi tarafdori bo‘lgan qismi noroziligiga sabab bo‘lib ulgurgan.
Bibi 2010-yili, Muhammad payg‘ambar (s.a.v.)ni haqorat qilgani uchun dinni tahqirlashda aybdor deb topilib, osib o‘ldirishga hukm qilingan edi.
Ma’lum bo‘lishicha, Bibi 2009-yil iyunida Shekhpur okrugidagi Ittan Vali qishlog‘ida meva terayotganida mahalliy aholi “musulmonlarniki” deb hisoblaydigan quduqdan suv ichgan. Bibi bilan birga ishlayotgan ayollar uni suvni bulg‘ashda ayblagan va shundan so‘ng qishloqda janjal kelib chiqqan.
Shundan so‘ng Bibini qo‘llab-quvvatlagan va umuman dinni tahqirlashga doir qonunlarni isloh qilish yuzasidan fikr bildirgan Panjob viloyati gubernatori Salmon Ta’sir o‘z qo‘riqchisi tomonidan otib tashlangan. Qotil qatl etilgan, biroq uning tarafdorlari siyosiy partiya tuzib, yaqinda bo‘lib o‘tgan saylovlarda ikki millionga yaqin ovoz oldi. Bibini qo‘llab-quvvatlagan ozchilik ishlari bo‘yicha vazir Shahboz Bhatti ham o‘ldirib ketilgan.
Bir necha mamlakatlar Bibiga boshpana taklif qilgan. Oliy sudning so‘nggi majlisida ayolning o‘zi qatnashmagan va oqlangani haqidagi xabarga ham ishonqiramagan. “Eshitganlarimga ishongim kelmayapti. Men hozir chiqib ketsam bo‘laveradimi? Nahotki meni qo‘yib yuborishayotgan bo‘lsa?”, — deya Bibining so‘zlaridan iqtibos keltirmoqda AFP.
Izoh (0)