Адлия вазирлиги республика бўйича 138 та янги таъсис этилган нотариус штат бирликларига танлов эълон қилди. Бу ҳақда вазирликнинг Telegram’даги «Ҳуқуқий ахборот» каналида маълум қилинди.
Жумладан, Тошкент шаҳрида – 28 та, Тошкент вилоятида – 17 та, Самарқандда – 15 та, Фарғонада – 13 та, Сурхондарёда – 12 та, Андижон, Қашқадарё ва Хоразм вилоятларида – 9 тадан, Бухоро ва Жиззах вилоятларида – 6 тадан, Навоийда – 5 та, Наманганда – 4 та, Қорақалпоғистон Республикасида – 3 та ҳамда Сирдарё вилоятида – 2 та бўш нотариус лавозимига танлов ўтказилади.
Танловда йигирма беш ёшдан кичик бўлмаган, олий юридик маълумотга, юридик мутахассислик бўйича камида уч йиллик иш стажига эга бўлган, шу жумладан, нотариал идорада камида бир йил стажировка ўтаган, малака имтиҳонини топширган Ўзбекистон фуқаролари иштирок этиши мумкин.
Шунингдек, қонунчиликка киритилган ўзгартиришларга мувофиқ судьялик лавозимида камида беш йил ишлаган ёки нотариус ёрдамчиси ёхуд адлия органларининг нотариал фаолиятга раҳбарлик қилиш ва ушбу фаолиятни назорат қилиш билан боғлиқ лавозимларида камида уч йил ишлаган шахслар стажировка ўтмасдан танловда иштирок этишлари мумкин.
Хабарда қайд этилишича, бугунги кунда Ўзбекистонда нотариусларнинг ойлик лавозим маошлари (барча устамалар ва пуллик хизматлардан келиб тушадиган даромадлар билан ҳисоблаганда, солиқлар тўлангандан сўнг) 4 миллион сўмни ташкил этмоқда. Бу кўрсаткич Тошкент шаҳрида 6 миллион сўмни, Самарқанд вилоятида 4 миллион сўмни, Фарғона вилоятида 4,5 миллион сўмни ташкил этмоқда. Ушбу маош миқдори нотариал идора томонидан кўрсатилган хизматлар ҳажмидан келиб чиқиб янада кўпроқ бўлиши ҳам мумкин.
Танловда иштирок этиш шартлари билан www.adliya.uz ва www.insonvaqonun.uz расмий веб-сайтлари орқали танишиш мумкин.
Изоҳ (0)