«Ходимларимизни ҳимоя қиламиз, агарда улар ҳақиқатда шунга лойиқ бўлса». Адлия вазири жорий йилнинг ўтган 9 ойида амалга оширилган ишлар, йўл қўйилган камчиликлар ва келгусидаги вазифаларга бағишланган кенгайтирилган ҳайъат мажлисида шу ҳақда маълум қилди, дея хабар беради ЎзА.
Тошкент давлат юридик университетида видеоконференцалоқа шаклида ўтказилган йиғилишда барча вилоятлар адлия органлари раҳбар ва масъул ходимлари иштирок этди.
Танқидий ва таҳлилий руҳда ўтган йиғилишда ҳуқуқий хизмат кўрсатиш тизими такомиллаштирилиб, адвокатура ва нотариат тизимида туб ўзгаришлар рўй бераётгани таъкидланди. Хусусан, фаолияти ташкил этилганига эндигина 6 ой бўлган туманлардаги адлия бўлимидан вазифасига нолойиқлиги учун 15 нафар ходим ишдан олинган. Нотариал тизимни кенгайтириш ва хизматлар сифатини ошириш учун жойларда 145 иш ўрни яратилди.
Вазирликка келиб тушаётган шикоятлар сони ўтган йилнинг шу даврига нисбатан 24 мингтага камайди. Бироқ, фуқароларнинг оғирини енгил қилиш, инсон ҳуқуқларини ҳимоя қилиши керак бўлган тизим ходимлари мурожаатларни етарлича ўрганмасдан жавоб бериши қайта шикоятларга сабаб бўлмоқда.
Улардан бири сифатида Қашқадарё вилоятида яшовчи фуқаро мурожаатини келтириш мумкин. Тегишли қонунда мурожаатларга жавоблар мумкин қадар мурожаат қилинган тилда берилиши қайд этилган бўлса-да, бунга риоя қилинмаган. Натижада фуқаро қайта шикоят қилган.
Шунингдек, адлия ходимлари хатти-ҳаракати юзасидан келиб тушаётган шикоятлар сони кўпаймоқда. Бу ташвишли, албатта. Мисол учун, ўтган даврда мингдан зиёд ана шундай шикоятлар келиб тушган бўлса, уларнинг 200 дан ортиғи Тошкент шаҳри, 30 дан зиёди Наманган, 30 га яқини Қашқадарё вилояти ҳиссасига тўғри келмоқда.
Мажлисда бугунги куннинг долзарб масалалари бўлган ҳуқуқий ахборотни етказиш, юридик хизмат ва норма ижодкорлиги соҳасидаги ишларни алоҳида «йўл хариталари» орқали амалга оширишга келишиб олинди.
Изоҳ (0)