22—26 октябрь кунлари Ўзбекистон мудофаа вазирининг ўринбосари полковник Азизбек Икромов бошчилигидаги ҳарбий делегацияси Хитойда расмий ташриф билан бўлди. Бу ҳақда вазирлик матбуот хизмати «Дарё»га маълум қилди.
Ташриф давомида Азизбек Икромов Хитой Миллий мудофаа университети раҳбарияти билан учрашиб, икки мамлакат олий ҳарбий таълим муассасалари ўртасида ҳамкорликни янада кучайтиришга келишиб олди. Мазкур ҳамкорлик кадрларни тайёрлаш, қайта тайёрлаш, шунингдек, ўзаро тажриба алмашиш каби масалаларда сезиларли даражада олдинга силжишни таъминлаб бериши кутилмоқда.
Бундан ташқари ўзбекистонлик ҳарбийлар Пекин шаҳридаги Ҳарбий ҳаво кучлари академияси ҳамда Миллий мудофаа институтида ҳам бўлди. Хитой олий ҳарбий таълим муассасалари бошлиқлари билан бўлиб ўтган учрашувларда икки мамлакат тингловчиларини масофадан туриб ўқитиш ва олий ҳарбий таълим муассасалар ўқитувчиларининг икки давлатга ташрифи давомида семинар-тренинг машғулотларини олиб бориши бўйича меморандум имзолашга келишиб олинди.
Сўнгги вақтларда Ўзбекистон Қуролли Кучлари академияси бир қатор хориж мамлакатларининг олий ҳарбий таълим даргоҳлари билан ҳамкорликни янада ривожлантириш бўйича сезиларли амалий ишларни олиб бормоқда. Хусусан, октябрь ойининг ўзида Германия ҳамда Покистон давлатларининг олий ҳарбий билим юртларининг профессор-ўқитувчилари Ўзбекистон Қуролли Кучлари академиясида бўлиб, ҳамкорликда амалга оширилиши лозим бўлган мақсадли режаларни белгилаб олишган эди.
Изоҳ (0)