Навоий вилояти Конимех туманида яшовчи фуқаро Shamsҳод Фармонов 2018 йил 11 сентябрь куни ўзига тегишли «Азизбек Афзал» хусусий корхонаси балансида бўлган автотеххизмат ва савдо дўкони бинолари давлат эҳтиёжларига олиб қўйилгани учун тўланиши лозим бўлган 80 миллион сўм зарар ҳокимият томонидан тўлаб берилмаётганидан норози бўлиб, Конимех тумани адлия бўлимига мурожаат қилган.
Бўлим томонидан мурожаатни ўрганиш давомида туман ҳокими 2018 йил 10 февраль куни «Наврўз» маҳалла фуқаролар йиғини Ажинияз кўчасида жойлашган Shamsҳод Фармоновга тегишли «Автомобильларга техник хизмат кўрсатиш» биносининг ер майдонини давлат ва жамоат эҳтиёжлари учун олиш тўғрисида қарор қабул қилгани аниқланган.
Мазкур қарордан келиб чиқиб тузилган келишув далолатномасига асосан, Shamsҳод Фармоновга тегишли давлат ва жамоат эҳтиёжлари учун қайтарилган 2100 квадрат метр ер майдонига эга бўлган бино ва объектларни буздириш ва етказилган 80 миллион сўм зарарни маҳаллий бюджетдан орттирилган маблағлар ҳисобидан қоплаб бериш назарда тутилган.
Бироқ фуқаро адлия бўлимига мурожаат қилгунига қадар келишилган сумма тадбиркорга асоссиз равишда тўлаб берилмасдан келинганлиги аниқланган. Бу билан Вазирлар Маҳкамасининг 2006 йил 29 майдаги «Давлат ва жамоат эҳтиёжлари учун ер участкаларининг олиб қўйилиши муносабати билан фуқароларга ва юридик шахсларга етказилган зарарларни қоплаш тартиби тўғрисида»ги Низом талаблари бузилган.
«Бу каби хато ва камчиликларга йўл қуйилганлиги сабабли туман ҳокимлигига адлия бўлими томонидан тақдимнома киритилиб, тадбиркорнинг бузилган ҳуқуқи тикланди. Натижада тадбиркорга 80 миллион сўм маблағ ундириб берилди», — дейилади ЎзА ахборотида.
Изоҳ (0)