АҚШ Федерал қидирув бюроси (ФҚБ) инвесторларни алдашда гумон қилиб, Tesla компаниясига нисбатан тергов бошлади. Бу ҳақда, компаниядаги манбаларга асосланиб, The Wall Street Journal хабар бермоқда.
ФҚБ компания Model 3 электромобилларини ишлаб чиқариш режаларига доир 2017 йилги очиқ баёнотларида рақамларни қасддан ошириб кўрсатган-кўрсатмаганлигини текширади. The Wall Street Journal маълумотларига кўра, ФҚБ сўроқ учун Tesla’нинг бир қатор собиқ ходимлари билан алоқага чиқиб улгурган.
Tesla асосчиси Илон Маск компания 2017 йил охирига бориб ойига 20 минг донадан машина ишлаб чиқаришини таъкидлаган эди, бироқ амалда бундай бўлмади; Tesla 2018 йилнинг июнидан бошлабгина ҳафтасига 5 минг донадан автомобиль ишлаб чиқаришни бошлади, бироқ бу кўрсаткични ҳам узоқ муддат сақлаб тура олгани йўқ, деб ёзади The Verge.
Август ойида Илон Маск Tesla’ни хусусий компанияга айлантириш режаси борлиги ҳақида твитлар ёзганидан сўнг, АҚШ Қимматли қоғозлар ва биржалар бўйича комиссияси тадбиркорни фирибгарликда айблаган эди. Охир-оқибат Маск комиссия билан келишувга эришди — у Tesla директорлар кенгаши раислигидан кетади ва 20 миллион доллар миқдорида жарима тўлайди. Компанияга ҳам шунча жарима солинган.
Изоҳ (0)