Германия ҳукумати мамлакатнинг бир қатор федерал ерларини нефть маҳсулотлари билан таъминлаш мақсадида стратегик нефть захираларини очишга қарор қилди. Бунга ёзнинг нисбатан қурғоқчил келгани, бунинг оқибатида Германиянинг асосий дарёси — Рейндаги сув сатҳи кескин пасайиб кетгани сабаб бўлди, дея хабар бермоқда «Коммерсантъ».
Бу йил танкерлар ва нефть қуйиш кемалари дарёга кириш учун ё ёқилғи юкини камайтириши керак, йўқса умуман дарё бўйлаб суза олмайди. Қайд этишларича, Германиянинг нефть хом ашёси ва нефть маҳсулотлари стратегик захираси бундан 40 йил аввал ташкил этилган бўлиб, ўтган вақт давмида фақат уч марта очилган.
Мамлакатнинг стратегик захирасида 24 миллион тонна нефть хом ашёси ва нефть маҳсулотлари мавжуд. Ушбу захира автомобиль ва ҳаво транспорти фаолиятини 90 кун давомида узлуксиз таъминлаб туриш учун зарур. Ундан, шунингдек, кимёвий маҳсулотлар ишлаб чиқаришда хом ашё сифатида ҳам фойдаланилади.
Германия иқтисодий вазирлигидан маълум қилишларича, ушбу чора превентив бўлиб, фақат бир неча федерал ерни қамраб олади, холос. Вазирлик маълумотларига кўра, бунда кенг миқёсли инқироз ҳақида сўз бораётгани йўқ.
Изоҳ (0)