Молия вазирлиги ғазначилигида журналистлар ва ОАВ ходимлари иштирокида «Ёқилғи энергетика соҳасидаги ислоҳотлар самарадорликка эришиш учун шароит яратиш асосида ижтимоий масъулиятни кучайтириш» мавзусида очиқ мулоқот бўлиб ўтди, деб хабар беради Spot.
Маълумотларда келтирилишича, тажриба тариқасида фақат Тошкент шаҳрининг Юнусобод туманида 2019 йилнинг 1 январидан бошлаб аҳоли учун газ ва электр энергиясидан фойдаланишнинг базавий меъёрлари ўрнатилади.
Табиий газ учун фойдаланиш меъёрлари — беш ойлик иситиш мавсумида ҳар бир абонентга 1 000 кубометрни, йилнинг бошқа даврида (ҳисоблагич мавжудлигидан қатъий назар) 250 кубометрни ташкил этади.
Электр энергияси учун эса — ҳар бир абонентга бир ойда 300 квт/соат. Ҳисоб-китоблар кўрсатишича, киши бошига электр энергия сарфи ойига ўртача 60 квт/соат.
Пойтахтда ўтказиладиган тажриба қатнашчилари меъёрлар чегарасида электр энергияси ва табиий газ учун одатдаги нарх билан, меъёрдан ортиқ ишлатгани учун эса 20% га қимматроқ тўлашади.
Бу ресурслардан тежамкорлик билан фойдаланишни рағбатлантиради. Ушбу янгича ёндашувни синовдан ўтказилиши келгусида ундан қандай фойдаланиш, қонунчиликни такомиллаштириш ва ҳисоб-китобларни амалга ошириш каби масалалар бўйича аниқ таклифлар ишлаб чиқиш имконини беради.
Таъкидланишича, буларнинг барчаси ўртача даромадли оилалар ва аҳолининг кам таъминланган қатламини ижтимоий ҳимоя қилишга қаратилмоқда.
Изоҳ (0)