Сурхондарё вилояти Термиз шаҳрида хотин-қизлар қўмитаси, ички ишлар органи ходимлари ҳамда журналистлар жалб этилган тадбир доирасида қонунга зид равишда фаолият юритган 20 та тунги клуб фош этилди. Бу ҳақда Turon24 хабар берди.
Вилоят ҳокимлигининг муаммоларни ўрганиш бўйича «Жамоатчилик назорати» гуруҳи ва Термиз шаҳар ИИБ ҳамкорлигида Термизда тунги рейд ўтказилди. Дастлаб кафе, бар сифатида фаолият бошлаган, кейинчалик мижозлар сонини ошириш ва қўшимча даромад топиш мақсадида ноқонуний равишда тунги клубларга айлантирилган объектлар аниқланди.
«Тунги соат 1 дан ўтган бўлса-да, мижозлар орасида коллеж ўқувчилари, 18-19 ёшли ўсмирлар ҳам кўплигига гувоҳ бўлдик», деди тунги рейдда қатнашган журналист Алёр Ражабов.
«Золотая бочка», «Фумари», «Марокаш», «Жонибек-Сурхон-Термиз» тунги бар ва кафелари ҳамда тамаддихоналари ноқонуний чилимхона, тунги рақс клуби ва биллиардхоналарга айлантирилгани танқид қилинди. Тунги клубларда бўлган ёшларнинг ота-оналари, улар яшовчи маҳаллаларнинг масъуллари чақирилиб, жамоатчилик иштирокида далолатномалар тузилди.
Изоҳ (0)