Тошкент шаҳрининг Мирзо Улуғбек туманидаги депутатлик ва жамоатчилик назоратини таъминлаш бўйича ишчи гуруҳи томонидан жойлардаги амалий ишлар назоратини таъминлаш мақсадида Улуғбек шаҳарчасидаги тиббиёт ва таълим муассасаларидаги аҳвол ўрганилди. Бу ҳақда ЎзА хабар берди.
Хусусан, 286-умумтаълим ва 27-болалар мусиқа ва санъат мактаби, 582-мактабгача таълим муассасаси ҳамда 2-сонли Республика клиник шифохонасидаги ҳолатлар қаттиқ танқид қилинди.
Муассасаларда соғлом овқатланишни ташкил этиш, соғлиқ учун зарарли бўлган озиқ-овқат маҳсулотлари ва таомлар савдосига йўл қўймаслик, маҳсулотларнинг сифатли сақланиши, таълим муассасасида ижарага олинган ошхонадан фойдаланиш бўйича санитария ва гигиена қоида, нормаларига қатъий риоя қилиниши юзасидан мутахассислар ўз фикрини баён этди.
Шунингдек, муассасаларда куз-қиш мавсумига тайёргарлик кўрилганлиги ва иситилиш ҳолати, ёритиш мосламалари ва жиҳозларнинг талаб даражасида эканлиги, хавфсизлик талабларига риоя қилинганлиги, белгиланган ҳудудда алкоголь ва тамаки маҳсулотларининг реализацияси бор-йўқлиги ўрганилди.
Ўрганиш жараёнида мактаб ошхонасида бир маротабалик идишлар қайта ишлатилаётганлиги, иссиқлик тизимида камчиликлар мавжудлиги аниқланди. 2-сонли Республика клиник шифохонаси ошхонасида қўл ювиш учун мосламалар ўрнатилмаганлиги аниқлангач, мавжуд камчиликларни бартараф қилиш муддатлари белгиланди.
Беморлар навбат кутишга мажбур қилинган. 2-сонли Республика клиник шифохонасига меҳнат фахрийси Т.Саидрасулов даволаниш учун мурожаат қилган. Аммо айни вақтда жой йўқлигини айтиб, уни ноябрь ойига навбатга ёзиб қўйишган. Ҳозирда эса у ўзини жуда ёмон ҳис қилаётганлигини ўрганувчи гуруҳга маълум қилган.
Ушбу мурожаат ўрганиб чиқилиб, фуқаро фойдасига ҳал этилди.
Жамоатчилик ишчи гуруҳи томонидан ўрганишлар давом этмоқда.
Изоҳ (0)