Туризмни ривожлантириш қўмитаси ёшларнинг туризм соҳасидаги бизнес ташаббусларини қўллаб-қувватлаш, самарали бизнес-режаларни амалга оширишда яқиндан кўмаклашиш мақсадида ёшлар ўртасида туризм соҳасидаги энг самарали бизнес лойиҳалар танловини эълон қилди.
Танловда олий маълумотга эга бўлган, олий таълим муассасасини охирги уч йил давомида битирган, туризм соҳасида ўз тадбиркорлик фаолиятини бошлаш истагида бўлган ёшлар иштирок этиши мумкин.
Танлов икки босқичдан иборат бўлиб, биринчи босқичда танлов иштирокчилари томонидан бизнес лойиҳалар танлов комиссиясига юборилади ва комиссия томонидан кўриб чиқилади.
Иккинчи босқич жорий йилнинг 20 декабридан бошланиб, биринчи босқич якуни бўйича саралаб олинган иштирокчилар ўртасида ўтказилади. Унда иштирокчилар ўзларининг бизнес лойиҳаларини танлов комиссиясига тақдим қилади.
Танлов мезонлари асосида ғолиб деб топилган лойиҳаларни амалга ошириш учун Туризмни ривожлантириш қўмитаси томонидан тегишли шартлар асосида энг кам иш ҳақининг 250 (икки юз эллик) баробаригача бўлган миқдорда пул мукофотлари ажратилади.
Шунингдек, лойиҳа самарадорлигини таъминлаш мақсадида танлов ғолиблари Ўзбекистон—Япония маркази ва Туризмни ривожлантириш қўмитаси томонидан ташкил этиладиган туризм соҳасида бизнес юритиш ва бошқариш бўйича махсус ўқув курсларида таълим олиш имкониятига эга бўлади.
Ҳужжатлар жорий йилнинг 1 декабрига қадар қабул қилинади.
Изоҳ (0)