Ўзбекистонда ижтимоий жиҳатдан алоҳида эътиборга муҳтож болаларни ҳимоя қилиш бўйича чора-тадбирларни муҳокама қилишга бағишланган халқаро конференция Тошкентда ўз ишини бошлади. Бу ҳақда UNICEF’нинг Ўзбекистондаги ваколатхонаси матбуот хизмати хабар бермоқда.
Ушбу соҳадаги миллий сиёсат ва жаҳон амалиёти муҳокама қилинадиган ушбу тадбирда Ҳукумат вакиллари ва бир қатор давлатлардан ташриф буюрган халқаро экспертлар иштирок этмоқда.
Икки кунлик конференция иштирокчилари қийин ҳаётий вазиятда қолган, жумладан ота-она қарамоғидан маҳрум бўлган ҳамда қонун билан зиддиятдаги болаларни ҳимоя қилиш масалаларини муҳокама қилади. Ўзбекистонда ижтимоий ҳимоя тизимини энг илғор халқаро тажриба асосида янада мустаҳкамлашга алоҳида эътибор берилади.
Ўзбекистон хотин-қизлар қўмитаси ва UNICEF биргаликда ўтказган баҳолаш натижалари болалар ижтимоий ҳимояси учун масъул ягона мувофиқлаштирувчи органни ташкил қилиш ҳамда ижтомоий ходим касбини ривожлантириш зарурлигини кўрсатди.
Соғлиқни сақлаш, таълим ва ёшлар масалалари билан бир қаторда ижтимоий ҳимоя тизимини мустаҳкамлаш 2017—2021 йилларда Ўзбекистонни ривожлантириш стратегиясининг устувор йўналишлари қаторига киради.
«Дунёдаги ҳар бир мамлакат заиф оилаларни ва болаларни аниқлай оладиган, уларнинг эҳтиёжларини қондирадиган ижтимоий хизматларни таъминлайдиган ва бу хизматларни тақдим этишни мувофиқлаштириш ва назорат қилишга қодир бўлган болаларни ҳимоя қилишнинг кучли тизимига сармоя киритиши керак,» — деди UNICEF’нинг Ўзбекистондаги ваколатхонаси раҳбари Саша Грауманн.
«Болаларни ҳимоя қилишнинг самарали тизимлари болаларга нисбатан зўравонлик қилиш, қўпол муносабат ва бепарволик ҳолатларининг олдини олиш ва уларга жавоб қайтариш учун мавжуд тизимдаги камчиликларни баҳолаш ва муҳокама қилиш орқали яратилади»
Халқаро конференция Республика болалар ижтимоий мослашуви маркази, «Сен ёлғиз эмассан» жамғармаси, «Оила» маркази ва UNICEF томонидан ташкил этилган.
UNICEF болаларни ҳимоя қилиш тизимини мустаҳкамлаш ва мамлакатнинг барча ҳудудларида ижтимоий ҳимояга муҳтож болаларнинг аҳволини яхшилаш учун Бола ҳуқуқлари тўғрисидаги конвенциянинг тавсияларини бажариш учун Ўзбекистон ҳукумати билан ҳамкорлик қилади.
Изоҳ (0)