Францияда профессионал велоспортчилар ўртасида Chrono des Nations халқаро турнири бўлиб ўтмоқда. Мусобақада Ўзбекистон терма жамоаси аъзоси Ольга Забелинская ҳам иштирок этди, деб хабар беради МОҚ матбуот хизмати.
26,5 километр масофага ўтказилган пойгада Забелинская барча рақибларини ортда қолдирди ва биринчи бўлиб маррага етиб борди. У 35 дақиқа 54 сония (ўртача тезлик 45 км/соат) натижа билан олтин медалга эга чиқди. Ундан кейинги ўринни 12 сония кеч маррага кириб борган даниялик Эмма Йоргенсен эгаллади. Кучли учликка пешқадамдан 35 сония кеч қолган мезбон спортчи Оудри Кордон-Рагот якун ясади.
Қайд этиш лозим, Забелинская ҳар йили ўтказиладиган ушбу мусобақада тўртинчи маротаба иштирок этди. Аммо у илк ғалабасини айнан шу мавсумда Ўзбекистон терма жамоаси таркибида қўлга киритди.
Маълумот учун, Россия терма жамоаси таркибида Забелинская 2012 йилда Лондондаги Олимпиадада иккита бронза(яккалик ва жамоавий баҳсларда) медалини қўлга киритган. 2016 йилда Риодаги олимпия ўйинларида эса яккалик баҳсларида кумуш медалига сазовор бўлган.
Изоҳ (0)