2018 йил 9 октябрь куни соат тахминан 18:00 атрофида Ўзбекистон Республикаси ИИВ Ўз хавфсизлик бошқармаси Самарқанд вилояти бўйича бўлими ва Пахтачи тумани прокуратураси ходимлари томонидан тезкор тадбир ўтказилди, деб хабар беради «Дарё» мухбири Фарҳод Норбўтаев.
Тадбир давомида Пахтачи тумани Истиқлол кўчасида жойлашган ИИБ маъмурий биноси ёнида ИИБ ходими С.М.га фуқаро Т.М. тўпланган ҳужжатлар бўйича енгиллик яратиш ва маъмурий тартибда чора кўриши эвазига 980 000 (тўққиз юз саксон минг) сўм миқдордаги пулларни пора тариқасида берган вақтида тадбир иштирокчилари томонидан ашёвий далиллар билан ушланган.
Самарқанд вилоят ИИБ матбуот хизмати берган маълумотга кўра, Пахтачи тумани «Гулобод» маҳалласида яшовчи, якка тартибда меҳнат фаолияти билан шуғулланувчи, 1991 йилда туғилган, фуқаро Т. М. дала шийпонида таркибида олтин моддаси бўлган руда тошларни майдалашга мўлжалланган қўлбола усулда ясалган тегирмонни ишлатаётганлиги ҳолати юзасидан олиб борилаётган терговга қадар текширув ҳаракатлари давомида, 2018 йилнинг 6 октябрь куни фуқаро Т.М.дан ҳолат бўйича тушунтириш хати олиш учун туман ИИБ га таклиф қилинган.
Т.М. ички ишлар ходими хизмат хонасига келиб, унга тўпланган ҳужжатлар бўйича енгиллик яратиш ва маъмурий тартибда чора кўриши эвазига 1 000 000 (бир миллион) сўм пулларни пора сифатида таклиф қилган.
Т.М.га қилаётган ҳаракатлари ноқонуний эканлигини тушунтириб берилган бўлсада, маъмурий жавобгар бўлиши учун пора сифатида пул беришини маълум қилган. У билан бўлган сўзлашувлар хизмат хонасидаги компьютерга ўрнатилган камера орқали видео тасвирга олганлигини билдириб, унга нисбатан қонуний чора кўришни сўраган.
Айни пайтда мазкур ҳолат юзасидан Пахтачи тумани прокуратураси томонидан Т. М.га нисбатан Жиноят Кодексининг 211-моддаси 1-қисми билан жиноят иши қўзғатилган.
Изоҳ (0)