Ҳуқуқшунос, блогер Хушнудбек Худайбердиев Давлат тест марказига илтимоснома йўллади. Таъкидланишича, бу аслида унинг эмас, балки юз минглаб ёшларнинг илтимосидир.
«Барчамизга маълумки, янги ўқув йили бошланиши билан битирувчи йигит-қизларимиз тест синовларига тайёргарликни янада жадаллаштириб юборишади. Ўзи танлаган йўналиши бўйича тест саволлари тушадиган учта фандан жиддий шуғулланишни бошлашади.
Мана, янги ўқув йилининг салкам 1 ярим ойи ҳам ортда қолди. Лекин ҳанузгача келгуси йилда тушадиган тест саволлари айнан қайси дарсликлар асосида тузилиши маълум эмас. Аввалги йилларда ҳам дарсликлар рўйхати минг афсуски кечроқ эълон қилинар эди. Аммо жорий йилги ҳолат ҳар йилгидан ҳам ўзгача. Сабаби узоқ йиллик танаффусдан кейин Ўзбекистонда илк марта мактабларнинг 11-синф битирувчилари ҳам ОТМларга ҳужжат топширишади. Бу эса дарсликлар билан боғлиқ вазиятни янада чигаллаштирмоқда.
Агар академик лицей ва касб-ҳунар коллежларининг дарсликлари ҳамда ўрта мактабларнинг дарсликлари ўртасида фарқлар мавжуд бўлса, унда тест саволларини шакллантириш қай тартибда бўлади, деган савол кўпчиликни ўйлантирмоқда. Мактабда таҳсил олган абитуриент академик лицей ва коллеж дарсликларини ҳам қўшимча ўқишга мажбур бўладими? Ёки унинг тескариси, коллеж битирувчиси 10—11-синф дарсликларини ҳам ўқиши керакми?
Хуллас, саволлар ва тушунмовчиликлар бисёр, ҳозирча жавоби йўқ.
Ҳурматли, ДTМ вакиллари.
Илтимос, тезроқ дарсликлар масаласига ойдинлик киритиб берсангиз.
Масаланинг бир жиҳатини унутмаслик керакки, тест жараёнларига оид янгиликлар қанча кеч эълон қилинса, янгиликни ҳазм қилиш муддати қанча қисқа бўлса, халқ орасида тушунмовчилик шунча кўпаяди ва бу охир-оқибат кўчадаги фирибгарларнинг коррупцион тузоғи учун шароит яратиб беради», — дейилади мурожаатда.
Изоҳ (0)