Индонезия расмийлари Сулавеси ороли юз берган зилзила ва цунами вайроналари остида 150 мингдан ортиқ одам бўлиши мумкинлиги ҳақидаги тахминни рад этмади. Бу ҳақда «РИА Новости» хабар бермоқда.
Индонезия Ташқи ишлар вазирлигининг Ахборот ва медиа бошқармаси бошлиғи Аҳмад Рамаданнинг сўзларига кўра, «Палу шаҳрининг турли қисмларида 150 мингдан ортиқ одам тириклайин кўмилиб қолган бўлиши мумкин, деб ҳисобланмоқда».
Ҳозирча қутқарувчилар вайроналар остидан 1558 нафар қурбоннинг жасадларини олиб чиқишга муваффақ бўлди. Ҳукумат ҳисоб-китобларига кўра, табиий офат оқибатида 65 мингдан ортиқ уй зарар кўрган ё вайрон бўлган.
28 сентябрь куни тонгда Индонезиянинг Сулавеси ороли соҳилларида, Палу шаҳри яқинида 6,1 магнитудали зилзила юз берган эди. Кейинроқ яна бир — 7,4 магнитудали зилзила ва бир неча кучли афтершоклар қайд этилди.
Ушбу зилзилалардан сўнг ҳукумат аввалига цунами хавфини эълон қилди, бироқ кейинроқ огоҳлантиришни бекор қилди. Огоҳлантириш бекор қилинганидан кўп ўтмай Палу шаҳрига тўлқинларининг баландлиги икки метрга етадиган цунами ёпирилди.
Индонезияда 11 октябрга қадар фавқулодда ҳолат тартиби жорий этилган. Ҳукумат табиий офат оқибатларини бартараф этиш учун 37,6 миллион доллар ажратган. Маҳаллий ОАВ маълумотларига кўра, зилзила ва цунами етказган зарар қиймати 658 миллион доллардан ортиқ.
Изоҳ (0)