Содир бўлган ёнғинларни тезликда ва телефон қўнғироғи бўлишидан аввал аниқлаш мақсадида, Тошкент шаҳридаги 12 та баланд қаватли бинода 14 та юқори сезгирликдаги камералар ўрнатилди. Бу ҳақда ИИВ жамоатчилик ва ОАВ билан алоқалар бошқармаси хабар берди.
Бугунги кунда Тошкент шаҳар ИИББ Ёнғин хавфсизлиги бошқармаси Куч ва воситаларни бошқариш ва мувофиқлаштириш марказида ёнғин ўчириш самарадорлигини, тезкорлигини оширишга қаратилган махсус дастур ишлаб чиқилди.Ушбу тизим дастурий-техник комплексларни, автоматлаштирилган воситаларнинг тезкор мониторингини, куч ва воситаларнинг бошқаришни ҳамда мавжуд ва истиқболли автоматлаштирилган тизимларни ўз ичига олади.
Айни вақтда ушбу дастурни Самарқанд, Наманган ва Тошкент вилоятлари ИИБ Куч ва воситаларни бошқариш ва мувофиқлаштириш марказларига татбиқ қилиш юзасидан бир қатор ишлар амалга оширилмоқда.
Қайд этилган вилоятлардаги ёнғин ўчириш автомобиллари навигаторлар билан жиҳозланган бўлиб, уларнинг ҳаракатини онлайн режимида кузатиш мумкин.
Тошкентда 12 та баланд қаватли бино ва телеминорага юқори сезгирликдаги, 360 даражадаги кўриш бурчаги ҳамда уларни диспетчер иш жойидан бошқариш имкониятига эга 14 та IP камералар ўрнатилди. Ушбу камералар реал вақтда содир бўлган ёнғинларни аниқлаш ва кузатиш имконини беради. Қисқа вақт ичида улар оловнинг дастлабки босқичида 20дан ортиқ ёнғинни 101 рақамига қўнғироқдан олдин аниқлашга ёрдам берганини таъкидлаш жоиз.
Шунингдек, бундай камералар Тошкент, Самарқанд ва Наманган вилоятларида ҳам синов тартибида ўрнатилди.
Изоҳ (0)