Икки боласи билан ажрашган андижонлик М.Қулматованинг ёлғиз бошига ҳам оила, тирикчилик ташвиши оғирлик қила бошлади. Шу учун у 2014 йил декабрда фарзандларини ташлаб ўзга юртга — Қозоғистоннинг Остонасига отланди. Бу ҳақда ЎзА хабар бермоқда.
Қўшни давлат пойтахтида ресторандан иш топиб, ошпазлик қилди. Икки йилдан сўнг вақтинчалик рўйхатдан ўтиш талабларини бузгани учун «депорт« қилинди. Лекин яна ўша ноқонуний бўлса ҳам ишини давом эттирди.
Орадан уч йилдан кўпроқ вақт ўтиб, қишлоғи, яқинлари, айниқса, фарзандлар соғинчи тирикчилик важидан устун келиб, қайтишга аҳд қилди. Бу орада илгари «депорт« бўлгани ёдига тушиб, чегарадан ўтишда жаримага тортилиши мумкинлиги ҳақида ўйга толди. Ўйлаб-ўйлаб, «жаримасиз» йўлдан — давлат чегараларини яширин йўллар орқали бузиб ўтишга қарор қилди.
М.Қулматова қашқадарёлик Б.Б. билан Янгийўл тумани, Навоий номли маҳалла фуқаролар йиғинининг айланма йўллари орқали Ўзбекистон чегара тўсиқларини бузиб ўтаётган вақтида чегара посбонлари томонидан қўлга олинди.
Жиноят ишлари бўйича Янгийўл тумани судининг сайёр суд мажлисида мазкур жиноят иши кўриб чиқилди. Суд М.Қулматованинг қилган ишидан пушаймон экани, икки нафар ёш фарзанди борлиги, барча оғирлаштирувчи ва енгиллаштирувчи ҳолатларни инобатга олиб, бир йил муддатга синов муддати билан озод қилиш бўйича қарор қабул қилди.
Изоҳ (0)