Олий ва ўрта махсус таълим вазирлиги ҳузурида жамоатчилик кенгаши тузилди

Олий ва ўрта махсус таълим вазирлигида ушбу муассаса ҳузурида жамоатчилик кенгашини тузишга бағишланган мажлис бўлиб ўтди. Бу ҳақда ЎзА хабар берди.

Унда олий ва ўрта махсус таълим вазири Ином Мажидов, вазирлик ҳузуридаги жамоатчилик кенгаши аъзолари, вазирликнинг бошқарма ва бўлимлари раҳбарлари иштирок этди.

Мажлисда Олий ва ўрта махсус таълим вазирлиги ҳузуридаги жамоатчилик кенгаши раиси ва аъзолари рўйхати низом асосида шакллантирилди.

Низомга кўра, кенгаш ўз ишини жамоатчилик асосида олиб боради ва доимий фаолият юритувчи маслаҳат-кенгаш органи ҳисобланади. Жамоатчилик кенгаши вазирлик аппарати ҳузурида ташкил этилади ва унинг фаолияти вазирлик тасарруфидаги барча олий таълим муассасалари, марказ ва ташкилотларга тааллуқли бўлади.

Жамоатчилик кенгаши таркиби раиси, раис ўринбосари, котиби ва аъзолардан иборат бўлиб, унинг қарорлари тавсиявий хусусиятга эга ҳисобланади.

Қабул қилинаётган норматив-ҳуқуқий ҳужжатларда олий таълим тизими иштирокчилари манфаатларини ҳимоя қилиш, профессор-ўқитувчилар ва талабалар ҳуқуқларини муҳофаза этиш, соҳага оид давлат хизматларини кўрсатиш, ижтимоий шериклик доирасида амалга ошириладиган битимлар, шартномалар, лойиҳалар ва дастурларни рўёбга чиқаришда вазирлик ва унинг мансабдор шахсларининг фаолияти устидан жамоатчилик назоратини амалга ошириш жамоатчилик кенгашининг асосий вазифалари этиб белгиланди.

Жамоатчилик кенгаши аъзолари яқин кунларда ҳудудларга чиқиб, тизимдаги муаммоларни аниқлаш ва уларни бартараф этиш юзасидан амалий ҳаракатларни бошлашга келишиб олди.

Мажлисда жамоатчилик кенгаши аъзолари томонидан овоз бериш йўли билан Муҳаммаджон Қуронов раис, Комилжон Каримов (Тошкент халқаро Вестминстер университети ректори) раис ўринбосари, Фарҳод Бабашев (Олий ва ўрта махсус таълим вазирлиги ахборот хизмати раҳбари) котиб этиб сайланди.