АҚШ давлат қарзи 30 сентябрда якунланган 2018 молия йили давомида 1,2 триллион доллардан зиёдга ўсди, деб ёзади The Washington Examiner. 28 сентябрь, жума куни давлат қарзи бутун тарихи мобайнидаги энг юқори нуқтага — 21,516 триллион долларга етди.
Ўтган ойда, мамлакат федерал ҳукуматининг заёмлари 2018-молиявий йилнинг илк 11 ойи ичида 895 миллиард долларни ташкил қилган, бу ўтган йилнинг шу даврига нисбатан 222 миллиард долларга кўп демакдир.
2020 йилга келиб, АҚШ бюджет тақчиллиги Барак Обаманинг президентлик давридаги каби 1 триллион доллар нуқтасига етади. Бунда қарзнинг ўсиш суръатлари йилига аллақачон 1 триллиондан ошаётганини ҳисобга олиш керак. Масалан, шу молиявий йилда тахминан ярим йил ичида давлат қарзи 20 дан 21 триллионгача ошди.
Давлат қарзининг энг юқори нуқтаси 2019 йил 1 мартга белгиланган, бу санагача ҳукумат исталган суммада қарз олиши мумкин. Конгрессдаги консерваторлар фикрича, ҳукумат харажатлари ҳеч қанақасига чекланмаганлиги сабабли бюджет тақчиллиги яқин йилларда ўсишда давом этади.
Изоҳ (0)