Абитуриент ДТМ хатосини исботлади ва бюджетда ўқийдиган бўлди

Абитуриент ДТМ хатосини исботлади ва бюджетда ўқийдиган бўлди. Бу бир томондан абитуриентларга ўзига нисбатан ишонч берса, бошқа томондан ДТМда ҳам ижобий силжиш борлигини кўрсатди. 

2017—2018 йилларда абитуриент ҳозирда давлат гранти асосида Тошкент тиббиёт академияси талабаси. 10 ой давомида тайёргарлик кўриб, чуқур билим ва кўникмаларга эга бўлган Саидазим Сиддиқжонов  имтиҳондан чиққан заҳоти бир саволнинг нотўғри тузилганлигини тахмин қилади ва дарҳол «Profi Education»да таълим берган устози Нодиржон Ҳошимовга қўнғироқ қилиб, саволнинг ечилиш усулини у ўргатган усулда чиқара олмаганлигини айтади.

Аввалига устоз Нодиржон Ҳошимов бунга эътибор бермайди, чунки ҳар хил ҳолат бўлиши мумкин, балки ҳаяжондан ўқувчи масаланинг шартини аниқ ёдлаб ололмагандир ёки бирор бир элемент қолиб кетган бўлиши мумкин. Лекин ўз шаштидан қайтмаган Саидазим ўзи ишонч ҳосил қилиш учун, устози берган билимларни оқлаш учун ДТМга аппелацияга берди. Аппелация жараёнида кўпчилик «Ҳа, шартнома асосида бўлса ҳам кириб олибсанку, шукур қилмайсанми?», «Эее, қанийди биз ҳам ҳеч бўлмаса шартномага илинсак, бу ерларга келмас эдик», деган фикрларни билдирди, лекин у сўзидан қайтмади.

Аппелация жараёнида Саидазим яна ўша савол билан юзлашди, савол ечилиш усулини ёддан билади, лекин тўғри жавоб йўқ. Шу савол билан ДТМ нинг кимё бўйича эксперти олдига боради ва саволга жавоб топиб беришни сўрайди. Эксперт жавоб чиқаргандек бўлади. Саидазим аппелация жараёнидан чиқиб устози Нодиржон Ҳошимовга қўнғироқ қилиб: «Устоз, сиз айтган усул сал бошқачароқ экан, бу масала мана бунақа усулда чиқар экан», дейди.

Лекин устоз масала нотўғри эканлигини ва экспертнинг хулосаси янглиш эканлигини тушуниб етади ва дарҳол шогирдига қайта аппелацияга бериш кераклигини айтади. Шогирд қайта аппелацияга берди ва мустақил эксперт сифатида устози Нодиржон Ҳошимовни аппелация жараёнига қўйишларини сўради. Қайта апелляция жараёнида ДТМ ходимлари ҳақиқатдан ҳам ўқувчининг хулосалари тўғри эканлиги, саволда тўғри жавоб йўқлигини тан олади ва ўзлари юборган хулосада буни қайд этади.

Энди Сиддиқжонов Саидазим 6 йил давомида шартнома асосида эмас, балки давлат гранти асосида таҳсил олади. Чунки дастлабки тест натижаларига кўра Саидазимга давлат грантига ўтиш учун атиги 0.9 бал етмаётган эди, энди унда 2.1 бал қўшиб берилади.