Қарши шаҳридаги «Бахтли оила» тўйхонасида 27 сентябрь куни бўлиб ўтган тўй маросимидан сўнг овқатдан заҳарланганлар сони 74 кишига етди. Бу ҳақда Ўзбекистон Соғлиқни сақлаш вазирлиги Ахборот хизмати «Дарё»га маълум қилди.
Аввалроқ «Бахтли оила» тўйхонасидаги тўйдан сўнг 28 сентябрь куни 16 нафар фуқаро, 29 сентябрь куни эса 7 нафар фуқаро овқатдан заҳарланиш — «ўткир гастроэнтерит» ташхиси билан Қашқадарё вилоят Юқумли касалликлар шифохонасига ётқизилгани ҳақида хабар берилган эди.
Соғлиқни сақлаш вазирлигидан маълум қилишларича, юзага келган ушбу вазият юзасидан вилоят Юқумли касалликлар шифохонасида махсус штаб ташкил этилган ва тўйда қатнашганларнинг рўйхатини шакллантириш мақсадида патронаж ҳамширалар ёрдамида уйма-уй кўрик ташкил этилган. «Натижада тўйда қатнашганлар орасида касаллик белгилари бўлган 42 нафар фуқаро аниқланиб, шифохонага ётқизилган», — деди Соғлиқни сақлаш вазирлиги ахборот хизмати раҳбари Фурқат Санаев.
Шу муносабат билан тўйдан сўнг заҳарланган фуқаролар сони 30 сентябрь ҳолатига кўра 74 кишига етган. Улардан 72 нафарининг аҳволи ўртача енгил ҳолатда экани, қолган икки беморнинг уйига жавоб берилгани айтилмоқда.
Айни вақтда санитария-эпидемиология органлари томонидан тўйхонада, шунингдек, тўй учун салат тайёрлаган фуқаронинг хонадонида ҳам ўрганишлар ўтказилган. Аниқланишича, тўйхона ошхонасида маҳсулотларга ишлов бериш цехлари (хоналари) ташкил этилмаган. Озиқ-овқат маҳсулотларини, шу жумладан, тез бузиладиган гўшт ва гўшт, сут ва сут маҳсулотлари, қандолат маҳсулотларини сақлаш учун совутгичлар етарли эмас.
«Мавжуд битта совутгич-камерада хом ва тайёр маҳсулотлар уларни сақлаш қоидаларига риоя килинмаган ҳолда сақланмоқда. Ошхона асбоб-ускуналари маркировка қилинмаган. Идиш-товоқларни ювиш учун шароит яратилмаган. Тўйхона ходимлари тиббий кўрикдан ўтмаган, санитария минимум ўқув курсларида ўқимаган», — дейилади вазирлик ахборотида.
Тўй учун уч хил салатни ўз яшаш хонадонида тайёрлаган Қарши шаҳрида истиқомат қилувчи фуқаронинг уйи ҳам текширилган ва унда «салат тайёрлаш учун умуман шароит яратилмаганлиги аниқланган». Жумладан, салат тайёрлаш битта хонада амалга оширилган, хом маҳсулотларни ювиш учун битта ваннадан фойдаланилган, фуқаро ушбу фаолият учун тегишли рухсатнома олмаган.
«Санитария-эпидемияга қарши талабларни бузганлиги учун тўй учун салат тайёрлаган фуқарога нисбатан маъмурий иш қўзғатилиб, у энг кам иш хақининг беш баробари (921 500 сўм) миқдорида жаримага тортилган.
Изоҳ (0)