Самарқанд шаҳридаги вилоят перинатал марказида кетма-кет содир бўлган нохуш воқеалардан сўнг марказ директори Бахтиёр Жуманов ишдан олингани ҳақида хабар берган эдик. Маълумотларга кўра шу вақтгача Самарқанд шаҳридаги 3-сон туғриқ комплекси бош шифокор бўлиб ишлаб келган Лола Ҳамроева вилоят перинатал марказига раҳбар этиб тайинланган. Бу ҳақида «Дарё» мухбири Фарҳод Норбўтаев хабар бермоқда.
Маълумот учун вилоят перинатал маркази директорининг Бахтиёр Жумановнинг ишдан кетишига марказда она ва бола ўлими, айниқса ёш аёллар билан боғлиқ ўлим ҳолати кўп қайд этилаётганлиги сабаб бўлган.
Хусусан, жорий йилнинг май ойида 1993 йилда туғилган Гўзал Ҳакимованинг туғилган фарзанди қиз, ўлганидан сўнг ўғилга айланиб қолган. Шунингдек, 24 июль куни ургутлик Саодат Хайруллаева иккинчи фарзандини дунёга келтираётган вақтда ҳам ўзи ҳам фарзанди вафот этган. Яқинда туғруқ вақтида 20 ёшли келинчак вафот этгани эса катта шов-шувларга сабаб бўлган.
Вилоят ҳокими вазифасини бажарувчи Эркинжон Турдимов Халқ депутатлари Самарқанд вилоят Кенгашининг 55-сессиясида Самарқанд шаҳридаги 4-сон туғриқхонада коррупция авжига чиққанлиги, бу ерда она ва бола ўлими, айниқса ёш аёлларнинг ўлими қайд этилаётган бўлсада, ҳамма жим қараб келаётганлигини, бунинг сабаби пулга бориб тақалишини билдириб ўтган.
Аввалроқ, яъни 24 сентябрь куни Самарқанд вилояти соғлиқни сақлаш бошқармаси бошлиғи Азиз Жўраев ўз вазифасидан озод этилиб, унинг ўрнига Самарқанд вилоят ногиронлар реабилитация маркази директори вазифасида фаолият кўрсатган Давронбек Жуманиёзов тайинланганди.
Изоҳ (0)