Давлат солиқ қўмитаси ICT Expo-2018 кўргазмасида «Солиқ хизмати – инсофли солиқ тўловчиларнинг ишончли ҳамкори» номли махсус экспозицияси билан иштирок этди. Бу ҳақда қўмита матбуот хизмати хабар берди.
2018 йил 26—28 сентябрь кунлари Тошкентда ICT Expo-2018 ахборот технологиялари миллий кўргазмаси бўлиб ўтмоқда. Кўргазма ўтказишдан асосий мақсад ахборот технологиялари ва коммуникациялари миллий соҳасининг ютуқларини намойиш қилиш, экспертлар жамоасининг профессионал платформасини шакллантириш, миллий бозор субъектларининг рақобатбардош устунликларини ривожлантиришдан иборат. Унда 35 мингга яқин меҳмон, 100 дан ортиқ экспонент компаниялар иштирок этди.
Кўргазмада маҳаллий ва хорижий ташкилот ҳамда компаниялар ўзининг АКТ соҳасидаги энг илғор лойиҳалари билан иштирок этмоқда. Хусусан, Ўзбекистон Республикаси Давлат солиқ қўмитаси ва Янги технологиялар илмий-ахборот маркази ҳам соҳага доир дастурий маҳсулотлари тақдимоти билан қатнашмоқда.
Солиқ тўловчилар томонидан ўз фаолиятларида муваффақиятли фойдаланилаётган «Солиқ» мобил иловаси, www.soliq.uz расмий веб-сайти, my.soliq.uz веб-портали, Солиқ тўловчининг шахсий кабинети, Маълумотларни қайта ишлаш маркази, Маълумотларни узатиш корпоратив тармоғи, Электрон солиқ ҳисоботларини тақдим этиш тизими, «Солиқ» комплекс ахборот тизими, Онлайн назорат-касса машиналари каби дастурлар шулар жумласидандир. Мазкур дастурларнинг аксарияти олдинроқ давлат идораларида АКТни жорий этиш бўйича энг яхши лойиҳалар сифатида эътироф этилган.
Кўргазмада Давлат солиқ қўмитаси томонидан 2018 йилда жорий этилган қатор лойиҳалар тақдимотига ҳам алоҳида эътибор қаратилган.
Изоҳ (0)