Жорий йилнинг 27 сентябрь куни Ўзбекистон Республикаси Молия вазирлигида Европа тикланиш ва тараққиёт банки (ЕТТБ) делегацияси билан учрашув бўлиб ўтди. Бу ҳақда вазирлик матбуот хизмати хабар бермоқда.
Учрашувда Европа тикланиш ва тараққиёт банки (ЕТТБ) билан ҳамкорликнинг бугунги ҳолати ва истиқболлари муҳокама қилинди. Таъкидланганидек, Ўзбекистон ва ЕТТБ ўртасида ҳамкорлик ривожланиб бормоқда. Хусусан, 2017 йилнинг 16 март ва 2018 йилнинг 1 август кунларида Ўзбекистон Президенти Шавкат Мирзиёэв Европа тикланиш ва тараққиёт банки президенти Сума Чакрабартини икки бор қабул қилди. Мулоқотларда Ўзбекистон ва ЕТТБ ўртасидаги ўзаро манфаатли ҳамкорлик юксак суръатлар билан ривожланиб бораётганини мамнуният билан қайд этди.
Олий даражадаги мазкур мулоқотларнинг самараси ўлароқ 2017 йилнинг ноябрь ойида Тошкент шаҳрида банк ваколатхонаси ўз фаолиятини қайта тиклади. Ҳозирда мамлакат ҳудудларида унинг филиалларини ташкил этиш кўзда тутилган. Ўтган даврда мазкур банк томонидан мамлакатда тадбиркорликни ривожлантиришга қаратилган лойиҳаларни молиялаштириш учун умумий қиймати 190 миллион доллардан ортиқ кредит линиялари ажратилди.
Айни пайда ЕТТБ экспертлари мамлакатда хорижий молиявий институтлар иштирокидаги инвестиция лойиҳаларини тайёрлаш ва ҳаётга татбиқ этиш самарадорлигини оширишга қаратилган янги тартибни ишлаб чиқишда фаол иштирок этди. Ўзбекистон Республикаси билан Европа тикланиш ва тараққиёт банки ўртасида ҳамкорлик тўғрисида меморандум ва Табиатни муҳофаза қилиш соҳасига техник кўмаклашиш лойиҳасини амалга ошириш бўйича битим имзоланди.
Учрашувда ҳамкорликни янада ривожлантириш масалалари муҳокама қилинди. Хусусан, Европа тикланиш ва тараққиёт банки билан ҳамкорликда қонунчилик базасини мустаҳкамлаш, давлат ва хусусий сектор ҳамкорлиги механизмларини жорий этиш, Ўзбекистон миллий қонунчилигини амалга оширишга мослашиш мақсадида тадқиқотлар ўтказиш бўйича «Йўл харитаси»ни ишлаб чиқиш масалалари муҳокама қилинди. Шунингдек, давлат-хусусий шерикчилик механизмларини такомиллаштириш борасида фикр алмашилди.
Изоҳ (0)