Тошкент вилоятида болалар иштирокида йўл-транспорт ҳодисаларининг олдини олиш ва мактабга уларнинг хавфсиз келиб- кетишини таъминлаш мақсадида «Диққат мактаб» ёзуви туширилган махсус жилетлар амалиётга татбиқ этилмоқда. Бу ҳақда ЙПХ матбуот хизмати «Дарё»га маълум қилди.
Бундай жилетларни Тошкент вилояти йўл патруль хизмати инспекторлари серқатнов йўллар ёқасида жойлашган мактаблар олдида ўқувчиларнинг мактабга келиш ва кетиш вақтларида кийиб олиб, уларнинг хавфсиз йўлдан ўтишларини таъминламоқда. Бу махсус жилетларнинг афзалликлари шундаки, олдинда мактаб борлиги ҳақида ҳайдовчига ахборот беради ва ҳушёрликка чақиради. Шунингдек, махсус жилет кўзга тез ташланиши учун ёрқин ранглардан иборат ва унга махсус нур қайтарувчи ашёлар ўрнатилган.
Бундай жилетлар асосан халқаро аҳамиятга эга бўлган М39 «Алмати—Бишкек—Тошкент—Термиз» автомобиль йўли, М34 «Тошкент—Душанбе» автомобиль йўли ва давлат аҳамиятига эга бўлган 4R6 «Тошкент—Чирчиқ—Чимён» йўли, 4R12 «Бектемир—Чирчиқ—Ғазалкент—Чорбоғ » автомобиль йўли, 4R2 «Тошкент—Тўйтепа-A373а автойўли» автомобиль йўллари ёқасида жойлашган 100 дан ортиқ мактаб, коллеж, лицей ва болалар серқатнов пиёдалар йўлакчасида хизмат олиб бораётган йўл патруль инспекторлари томонидан эрта тонгда фойдаланмоқда.
Изоҳ (0)