Расмий ташриф билан Ўзбекистонга келган Туркия бош вазири Бинали Йилдирим 25 сентябрь куни Самарқанд шаҳрида бўлди. Бу ҳақда ЎзА хабар берди.
Юқори мартабали меҳмон Олий Мажлис Қонунчилик палатаси спикери Нуриддин Исмоилов ҳамроҳлигида Ўзбекистоннинг биринчи Президенти Ислом Каримов мақбара-мажмуасини зиёрат қилди.
Туркия делегацияси мажмуада амалга оширилган бунёдкорлик ишлари ва бу ердаги энг қадимий обидалардан бири — Ҳазрати Хизр масжидини асраб-авайлаш борасидаги ишларга юксак баҳо берди.
Шундан сўнг, Бинали Йилдирим Имом Бухорий ва Абу Мансур Мотуридий ёдгорлик мажмуларини зиёрат қилди. Ушбу масканлар билан танишув чоғида муқаддас ислом дини ривожига беқиёс ҳисса қўшган буюк алломаларнинг бой маънавий меросини ўрганиш, улар номи билан боғлиқ қадамжоларни обод этиш юзасидан мамлакатда олиб борилаётган ишлар ҳақида батафсил маълумот берилди.
Туркиялик юқори мартабали меҳмон Самарқанд шаҳридаги Амир Темур мақбараси, Registon майдони ва бошқа тарихий обидаларни ҳам томоша қилди.
Изоҳ (0)