Toshkent viloyatida YPX xodimlari maktablar oldida maxsus jiletlardan foydalanmoqda
Toshkent viloyatida bolalar ishtirokida yo‘l-transport hodisalarining oldini olish va maktabga ularning xavfsiz kelib- ketishini ta’minlash maqsadida “Diqqat maktab” yozuvi tushirilgan maxsus jiletlar amaliyotga tatbiq etilmoqda. Bu haqda YPX matbuot xizmati “Daryo”ga ma’lum qildi.
Bunday jiletlarni Toshkent viloyati yo‘l patrul xizmati inspektorlari serqatnov yo‘llar yoqasida joylashgan maktablar oldida o‘quvchilarning maktabga kelish va ketish vaqtlarida kiyib olib, ularning xavfsiz yo‘ldan o‘tishlarini ta’minlamoqda. Bu maxsus jiletlarning afzalliklari shundaki, oldinda maktab borligi haqida haydovchiga axborot beradi va hushyorlikka chaqiradi. Shuningdek, maxsus jilet ko‘zga tez tashlanishi uchun yorqin ranglardan iborat va unga maxsus nur qaytaruvchi ashyolar o‘rnatilgan.
Bunday jiletlar asosan xalqaro ahamiyatga ega bo‘lgan M39 “Almati—Bishkek—Toshkent—Termiz” avtomobil yo‘li, M34 “Toshkent—Dushanbe” avtomobil yo‘li va davlat ahamiyatiga ega bo‘lgan 4R6 “Toshkent—Chirchiq—Chimyon” yo‘li, 4R12 “Bektemir—Chirchiq—G‘azalkent—Chorbog‘ ” avtomobil yo‘li, 4R2 “Toshkent—To‘ytepa-A373a avtoyo‘li” avtomobil yo‘llari yoqasida joylashgan 100 dan ortiq maktab, kollej, litsey va bolalar serqatnov piyodalar yo‘lakchasida xizmat olib borayotgan yo‘l patrul inspektorlari tomonidan erta tongda foydalanmoqda.
