Наманган туманида республика ишчи гуруҳи ташаббуси билан меҳнат ярмаркаси ўтказилди. Бу ҳақда ЎзА хабар бермоқда.
Ўрганишлар хулосасига асосан бугунги кунда энг долзарб бўлган бандлик муаммосига ечим излаш мақсадида ташкил этилган меҳнат ярмаркасида тумандаги 100 га яқин хўжалик юритувчи субъект 1 минг 250 та бўш иш ўрни билан иштирок этди.
— Бундай кенг кўламли меҳнат ярмаркаси ҳали ўтказилмаган эди, – дейди туман бандликка кўмаклашиш маркази директори С.Жўраев. — Тадбир 4 кун давом этди ва у ҳақда олдиндан вилоят оммавий ахборот воситалари орқали аҳолини меҳнат ярмаркасига чорловчи материаллар бериб борилди. Бундан ташқари, 3 мингдан ортиқ уяли телефон абонентларига хабар юборилди ҳамда 2 мингта таклифнома тайёрланиб, барча маҳаллаларда хонадонларга тарқатилди.
Ярмарка белгиланган режа-жадвалга мувофиқ, туман маданият ва аҳоли дам олиш масканида, Шўрқўрғон қишлоғидаги Наманган қишлоқ хўжалик касб-ҳунар коллежида ўтказилди. Унга 53 маҳалладан 2 минг 773 нафар ишсиз фуқаро таклиф этилди. Олис қишлоқлардаги ишсиз фуқароларнинг ҳам тўлиқ қамраб олинишига эришиш мақсадида сайёр меҳнат ярмаркалари ҳам ташкил қилингани диққатга сазовор.
Ушбу тадбирга масъул ишчи гуруҳлар ўзига ажратилган 8 та Damas автомашинасида энг олис маҳаллаларгача бориб, вилоят ва туман миқёсида мавжуд бўш иш ўринларини аҳоли ўртасида тарғиб қилди.
Меҳнат ярмаркасида 1200 нафар ишсиз фуқарога ишга йўлланма берилди. Улардан 397 нафари ҳақ тўланадиган жамоат ишларида, 430 нафари турли корхона-ташкилот ва муассасаларда, 106 нафари фермер хўжаликларида иш билан таъминланадиган бўлди. Бандлиги таъминланганларнинг 500 га яқини ёшлар, 295 нафари касб-ҳунар коллежи битирувчилари ва 600 нафардан кўпроғи аёллардир.
Изоҳ (0)