Вазирлар Маҳкамаси ҳузуридаги Таълим сифатини назорат қилиш инспекцияси бошлиғи Улуғбек Тошкенбоев бошчилигидаги делегация Россияга келди. Бу ҳақда инспекция ахборот хизмати маълум қилди.
Инспекция вакилларининг Россия Таълим ва фанни назорат қилиш федерал хизмати, Маориф вазирлиги, Таълим ва фан вазирлиги, Россия таълим академияси қошидаги Таълим сифатини баҳолаш миллий маркази, Жаҳон банкининг Москвадаги ваколатхонаси ва бошқа бир қатор таълим тизимидаги ташкилотлар билан учрашувлари режалаштирилган.
Бугун инспекция делегацияси Таълим ва фанни назорат қилиш федерал хизматида бўлди ва ташкилот фаолияти билан яқиндан танишди. Федерал хизмат раҳбари Сергей Кравсов ташкилотнинг асосий фаолияти тўғрисида кенгайтирилган даврада тақдимот шаклида маълумот берди ва инспекция вакиллари федерал хизматининг асосий бўлинмалари фаолияти билан яқиндан танишиб чиқди.
Учрашувда Россиялик мутахассислар томонидан Ўзбекистонда таълим сифатини таъминлаш бўйича олиб борилаётган ислоҳотларга юқори баҳо берилди. Айниқса, таълим сифатини назорат қилиш бўйича ягона давлат сиёсатини амалга оширувчи ва фақат ҳукуматга бўйсунувчи мустақил ташкилот, яъни инспекция ташкил этилганлиги алоҳида таъкидлаб ўтилди.
Учрашув якунида С. Кравсов Ўзбекистонга келиш истагини билдирди ҳамда инспекцияси билан ҳамкорлик алоқаларини янада ривожлантириш мақсадида икки томонлама ҳамкорлик шартномасини имзолашга келишиб олинди.
Изоҳ (0)