3—5 октябрь кунлари Тошкент шаҳридаги Ўзэкспомарказ павильонларида «Ипак йўлида туризм» 24-Тошкент халқаро сайёҳлик ярмаркаси бўлиб ўтади. Бу ҳақда «Дарё» мухбири Севара Нишонова хабар бермоқда.
Ушбу кўргазма 1995 йилдан буён Бутунжаҳон туристик ташкилоти БМТ қўллаб-қувватлаши билан ўтказиб келинмоқда. Ҳар йили кўргазмада дунёнинг турли бурчакларидан келган туризм бизнеси мутахассислари йиғилади.
Тадбирдан кўзланган мақсад — тажриба алмашиш учун халқаро платформа яратиш, Ипак йўли тарихий маданияти, табиий меросини ривожлантириш бўйича ҳамкорлик ишларини йўлга қўйиш ва келажакдаги истиқболли режалар муҳокамаси учун майдон яратишдан иборат. Жорий йилда Таиланд қироллиги, Сингапур, Миср, Малайзия, Озарбайжон, Ҳиндистон, Корея, Туркия, Хитой, Россия ва бошқа давлатлар ҳам кўргазмада иштирок этади.
Миллий кўргазма марказидан «Ҳунармандлар шаҳарчаси» лойиҳаси, мамлакат ҳудудидаги театр ва музей стендлари, «Шарқ бозори», «Рассомлар ҳиёбони», «Миллий таомлар» фестивали ҳамда Ўзбекистон дизайнерлари дефилеси ва бошқалар ўрин олган халқаро ва миллий павильонлар бўлади.
Миллий павильонда Ўзбекистон ҳудудларининг маданияти, туристик салоҳиятини намоён этувчи тақдимотлар намойиш қилинади.
Халқаро павильонда халқаро авиакомпаниялар, таълим муассасалари, сайёҳлик ва курорт йўлланмалари, сайёҳликнинг турли: суғурта, тиббиёт, банк соҳалари бўйича турлари стендлари жой олади.
Изоҳ (0)