«Дарё» таҳририятига Фарғона вилоятининг Риштон туманидан мурожаат келиб тушди.
Унда шундай дейилади:
«Ассалому алайкум, «Дарё»!
Мен сизларга Риштон туманидан ёзяпман. Риштон туманида қандли диабет билан оғриган беморлар танг аҳволда қолмоқда. Қарийб 5–7 кундан буён инсулин дори воситаси берилмаяпти. Бу дори воситаси қандли диабет билан оғриган беморларга давлат ҳисобидан берилар эди. Энг ёмони, бу дори дорихоналарда ҳам жуда камёб. Пули бор беморлар-ку иложини қилишяпти. Энг кўп жабр чекаётганлар эҳтиёжмандлар. Аҳволлари оғирлашяпти. Шу масалани ўрганиб чиқинглар.»
Аслида, шикоят йўллаган фуқаронинг исм-фамилияси кўрсатилмаган аноним мурожаатга эътибор қаратмасак ҳам бўларди. Бироқ, мурожаатда кўтарилган муаммо ўта муҳим масала – аҳоли саломатлигини таъминлаш билан боғлиқ бўлгани учун «Дарё» мухбири Риштон туманига бориб, вазиятни ўрганди.
Вилоят соғлиқни сақлаш бошқармасидан олинган маълумотга кўра, Фарғона вилоятида 22 165 нафар қандли диабет касаллиги билан оғриган беморлар бор. Вилоят эндокринология диспансери назорати остида 7 417 нафар беморга давлат ҳисобидан инсулин дори воситаси берилади. Умумий ҳисобда бир йиллик эҳтиёж учун 118 672 флакон, бир ойлик эҳтиёж учун 9 889 флакон дори воситаси талаб этилади.
Шунингдек, вилоят бўйича 328 нафар фуқарода қандсиз диабет касаллиги аниқланган. Улар учун йилига 8 112 флакон инсулин зарур бўлади.
Риштон тумани кўп тармоқли марказий поликлиникаси мудири Юсуфхўжа Кенжаевнинг таъкидлашича, август ойининг иккинчи ярмида инсулин дори воситасининг тақчиллиги кузатилган. Бироқ беморларга мазкур дори мунтазам бериб борилган.
Вилоят соғлиқни сақлаш бошқармаси бошлиғи Одилжон Умаровнинг 2018 йил 8 августдаги кўрсатма хатида инсулин ва десмопрессин дори воситалари захираси тугаб бораётгани қайд этилган. Беморлар орасида норозилик келтириб чиқармаслик учун шаҳар ва туманлар тиббиёт муассасаларига мазкур дори воситаларини давлат харидлари бўйича махсус ахборот портали – xarid.uz. орқали зудлик билан олиш юзасидан кўрсатма берилган. Шу орқали Риштон тумани марказий поликлиникаси рўйхатида турувчи 1 200 нафардан ортиқ диабет касаллиги билан хасталанган беморларни инсулин билан таъминлашда узилишга йўл қўйилмаган.
Биз поликлиника мудири билан учрашган вақтда ҳам туманнинг Чек Насриддин қишлоғида яшовчи К.Раҳмонова, Пандигон қишлоғида яшовчи Ш.Каримов, Риштон шаҳрида яшовчи К.Сиддиқова ва бошқа беморларга инсулин дори воситаси берилаётганига гувоҳ бўлдик.
– 27 йил Риштон тумани ҳудудида жойлашган вилоят қишлоқ хўжалик бошқармасига қарашли санаторийда ҳамшира бўлиб ишладим. Ҳозирда диабет касаллиги билан рўйхатда тураман. Инсулинни давлат ҳисобидан бепул беришади. Ҳар доим ўз вақтида оламан. Бизга ўхшаган беморларнинг саломатлиги ҳақида қайғурадиган шифокорлардан миннатдорман, – дейди Янгийўл қишлоғида яшовчи Насиба Қаюмова.
«Дарё» интернет-нашрига аноним бўлса-да, шикоят йўллаган фуқаронинг мурожаати тасдиғини топмади. Нафақат Риштонда, балки Фарғона вилоятининг барча шаҳар ва туманларида беморларга инсулин берилмоқда. Энг муҳими, ўз вақтида ва давлат ҳисобидан.
Изоҳ (0)