Тошкент шаҳрининг меҳнатга лаёқатли аҳолиси 1,5 миллион кишини ташкил этиб, улардан 1,1 миллион нафари иш билан банд, қарийб 99 минг киши ишсиз, 90 мингдан ортиғи эса меҳнат мигрантларидир. Бу ҳақда Тошкент шаҳри туманлари маҳаллий кенгашларининг қўшма мажлисларида муҳокама қилинган масалалар юзасидан ахборот берган Олий Мажлис Сенати комиссияси раиси Толибжон Мадумаров маълум қилди, дея хабар беради «Халқ сўзи».
Маълум бўлишича, ҳозирги пайтда Тошкент шаҳри бўйича фақат 91 минг киши Жамоат ишлари жамғармаси ҳисобидан бир марталик ва вақтинчалик ишларга жалб қилинган. Бу борада мавжуд имкониятлардан тўлиқ фойдаланилмаяпти. Жорий йил биринчи ярми якунларига кўра, норасмий банд аҳоли сони 141 минг нафардан зиёдни ташкил этган.
Пойтахт кўп қаватли уйларини куз-қиш мавсумига тайёрлаш дастури доирасида қарийб 158 миллиард сўм кредит маблағлари ажратилган. Бироқ белгиланган вазифаларнинг ярмидан кўпи (51 фоизи) ўз вақтида ижро этилмаган. Айниқса, Яшнобод, Чилонзор, Сергели, Бектемир ва Шайхонтоҳур туманларида бу йўналишдаги ишлар пайсалга солинаётгани қайд этилди.
Бундан ташқари, Тошкент шаҳридаги мавжуд 1440 та хусусий уй-жой мулкдорлари ширкатидан 304 таси молиявий аҳволи қониқарсизлиги сабабли имтиёзли кредитлар ололмаган. Уларнинг аксарияти Миробод, Шайхонтоҳур, Чилонзор, Сергели ва Юнусобод туманларида жойлашган.
Қўшма мажлисларда шу йўналишдаги ишларнинг бориши қониқарсиз деб топилиб, мавжуд муаммоларни тезда ҳал қилиш, жумладан, куз-қиш мавсумига тайёргарлик ишларини узоғи билан шу йилнинг 25 сентябрига қадар тўлиқ якунлаш, хусусий уй-жой мулкдорлари ширкатлари фаолиятини танқидий ўрганиш ва самарадорлигини ошириш чораларини кўриш бўйича масъул вазирлик ва идоралар ҳамда секторлар раҳбарларига аниқ вазифалар берилди.
Изоҳ (0)