Toshkent shahrining mehnatga layoqatli aholisi 1,5 million kishini tashkil etib, ulardan 1,1 million nafari ish bilan band, qariyb 99 ming kishi ishsiz, 90 mingdan ortig‘i esa mehnat migrantlaridir. Bu haqda Toshkent shahri tumanlari mahalliy kengashlarining qo‘shma majlislarida muhokama qilingan masalalar yuzasidan axborot bergan Oliy Majlis Senati komissiyasi raisi Tolibjon Madumarov ma’lum qildi, deya xabar beradi “Xalq so‘zi”.
Ma’lum bo‘lishicha, hozirgi paytda Toshkent shahri bo‘yicha faqat 91 ming kishi Jamoat ishlari jamg‘armasi hisobidan bir martalik va vaqtinchalik ishlarga jalb qilingan. Bu borada mavjud imkoniyatlardan to‘liq foydalanilmayapti. Joriy yil birinchi yarmi yakunlariga ko‘ra, norasmiy band aholi soni 141 ming nafardan ziyodni tashkil etgan.
Poytaxt ko‘p qavatli uylarini kuz-qish mavsumiga tayyorlash dasturi doirasida qariyb 158 milliard so‘m kredit mablag‘lari ajratilgan. Biroq belgilangan vazifalarning yarmidan ko‘pi (51 foizi) o‘z vaqtida ijro etilmagan. Ayniqsa, Yashnobod, Chilonzor, Sergeli, Bektemir va Shayxontohur tumanlarida bu yo‘nalishdagi ishlar paysalga solinayotgani qayd etildi.
Bundan tashqari, Toshkent shahridagi mavjud 1440 ta xususiy uy-joy mulkdorlari shirkatidan 304 tasi moliyaviy ahvoli qoniqarsizligi sababli imtiyozli kreditlar ololmagan. Ularning aksariyati Mirobod, Shayxontohur, Chilonzor, Sergeli va Yunusobod tumanlarida joylashgan.
Qo‘shma majlislarda shu yo‘nalishdagi ishlarning borishi qoniqarsiz deb topilib, mavjud muammolarni tezda hal qilish, jumladan, kuz-qish mavsumiga tayyorgarlik ishlarini uzog‘i bilan shu yilning 25-sentabriga qadar to‘liq yakunlash, xususiy uy-joy mulkdorlari shirkatlari faoliyatini tanqidiy o‘rganish va samaradorligini oshirish choralarini ko‘rish bo‘yicha mas’ul vazirlik va idoralar hamda sektorlar rahbarlariga aniq vazifalar berildi.
Izoh (0)